কৰ্ণাটক চৰকাৰৰ মহিলা কৰ্মচাৰীসকলৰ বাবে মাহেকীয়া বেতনসহ ছুটীৰ নিৰ্দেশনা

মহিলা কৰ্মচাৰীসকলৰ স্বাস্থ্য আৰু সুবিধাৰ প্ৰতি লক্ষ্য ৰাখি কৰ্ণাটক চৰকাৰে এক গুৰুত্বপূৰ্ণ সিদ্ধান্ত গ্ৰহণ কৰিছে। ৰাজ্য চৰকাৰে সকলো মহিলা কৰ্মচাৰীৰ বাবে মাহেকীয়া ঋতুস্ৰাৱৰ সময়ত এদিনৰ বেতনসহ ছুটী বাধ্যতামূলক কৰি চৰকাৰী নিৰ্দেশনা জাৰি কৰিছে।

১৮ৰ পৰা ৫২ বছৰ বয়সৰ সকলো মহিলা কৰ্মচাৰীক প্ৰতিমাহে এদিনৰ বেতনসহ ঋতুস্ৰাৱৰ ছুটী প্ৰদান কৰা হ’ব। ইয়াৰ অৰ্থ হ‘ল কৰ্মচাৰীসকলে বছৰত মুঠ ১২ দিনৰ পেইড ছুটী লাভ কৰিব।

এই আদেশ স্থায়ী, চুক্তিবদ্ধ আৰু ঠিকাভিত্তিক সকলো মহিলা কৰ্মচাৰীৰ ক্ষেত্ৰত প্ৰযোজ্য হ‘ব। এই ছুটী লোৱাৰ বাবে কৰ্মচাৰীৰ দৰমহা কৰ্তন কৰা নহ‘ব বুলি চৰকাৰে স্পষ্ট কৰি দিছে।

কৰ্ণাটক কেবিনেটে অক্টোবৰ মাহত এই প্ৰস্তাৱত অনুমোদন জনাইছিল আৰু তাৰ পিছত বুধবাৰে, ১২ নৱেম্বৰত, চৰকাৰে আনুষ্ঠানিক নিৰ্দেশনা জাৰি কৰে। এই নিৰ্দেশনাত স্পষ্টকৈ কোৱা হৈছে যে এই আদেশ উলংঘা কৰিলে বা ছুটী লোৱাৰ বাবে কোনো মহিলা কৰ্মচাৰীৰ দৰমহা কৰ্তন কৰিলে নিয়ম অনুসৰি ব্যৱস্থা গ্ৰহণ কৰা হ’ব।

এই সুবিধা কেৱল চৰকাৰী কাৰ্যালয়তে নহয়, বৰঞ্চ বিভিন্ন শ্ৰমিক আইনৰ অধীনত পঞ্জীভুক্ত সকলো উদ্যোগ আৰু প্ৰতিষ্ঠানত কাম কৰা মহিলা কৰ্মচাৰীসকলৰ বাবেও প্ৰযোজ্য হ‘ব। ইয়াৰ ভিতৰত ফেক্টৰী এক্ট, কৰ্ণাটক দোকান আৰু বাণিজ্যিক প্ৰতিষ্ঠান আইন, বাগিচা শ্ৰমিক আইন আৰু মটৰ গাড়ীত কাম কৰা শ্ৰমিক আইনৰ অধীনত থকা প্ৰতিষ্ঠানসমূহো অন্তৰ্ভুক্ত।

এই পদক্ষেপটোৱে কৰ্মক্ষেত্ৰত মহিলাসকলৰ স্বাস্থ্য আৰু কল্যাণক স্বীকৃতি জনাই এক সহায়ক আৰু অনুকূল পৰিৱেশ গঢ়ি তোলাত সহায় কৰিব। মহিলা কৰ্মচাৰীসকলৰ বাবে এয়া এক উল্লেখনীয় সকাহ।