IPL 2024 Final: হায়দৰাবাদৰ পৰাজয়ৰ পিছত কান্দিয়েই পেলালে কাব্যই; ভিডিঅ’ দেখি চকু সেমেকিল নেটিজেনৰ!
ছানৰাইজাৰ্ছ হায়দৰাবাদৰ সুন্দৰী স্বত্তাধিকাৰী কাব্য মাৰাণে শেষত চকুপানী ধৰি ৰাখিব নোৱাৰিলে। শিশুৰ দৰে মুকলিকৈ কান্দিয়েই পেলালে। দ্বিতীয় কোৱালিফায়াৰৰ পিছত ৰাজস্থান ৰয়েলছৰ অধিনায়ক সঞ্জু চেমছনক কন্দা দেখি সান্ত্বনা দিয়া কাব্যই নিজেই দেওবাৰে আৱেগ ধৰি ৰাখিব নোৱাৰিলে।
দেওবাৰে আন দিনৰ দৰেই চিপকত দুচকুত সপোন লৈ কাব্য উপস্থিত হয়। ২০১৬ চনৰ পিছত পুনৰ আই পি এলৰ ট্ৰফী জয় কৰাৰ সপোন দেখিছিল। ২০১৮ চনতো ছানৰাইজাৰ্ছে ফাইনেলত প্ৰৱেশ কৰিছিল। কিন্তু তেওঁলোকে সেইবাৰ ৰানাৰ্ছআপ হৈয়ে সন্তুষ্ট হ’ব লগা হৈছিল।
অৱশ্যে এইবাৰ কাব্যকে ধৰি ছানৰাইজাৰ্ছৰ অনুৰাগীয়ে বিশ্ব বিজয়ী অধিনায়ক পেট কামিন্সৰ হাতত ধৰি খিতাপ জয় কৰাৰ সপোন দেখিছিল। কিন্তু কলকাতা নাইট ৰাইডাৰ্ছৰ পৰাক্ৰমত ৫৭টা বল বাকী থকা অৱস্থাতে ৮ উইকেটত পৰাস্ত হয় হায়দৰাবাদ। ভাঙি গ’ল কাব্যৰ সপোন।
লগতে পঢ়কঃ IPL 2024 Final: ফাইনেলত হায়দৰাবাদৰ অসহায় আত্মসমৰ্পন; ১০ বছৰ পিছত পুনৰ চেম্পিয়ন কলকাতা
হায়দৰাবাদৰ হতাশাজনক পৰাজয়ৰ পিছতে দলৰ স্বত্বাধিকাৰী কাব্য মাৰাণে উচুপি কান্দি উঠিল। দুচকুৰ পৰা দুধাৰি চকুলো সৰি পৰা দেখা গ’ল। কাব্যই চকুপানী ৰোধ কৰিব নোৱাৰিলে। চকুলোৰে হাত চাপৰি বজাই কলকাতা নাইট ৰাইডাৰ্ছক সম্ভাষণ জনোৱাৰ সময়ত কাব্যই নিজৰ দলৰ খেলুৱৈৰ সংগ্ৰামৰো প্ৰশংসা কৰে।
ছ’চিয়েল মিডিয়াত ভাইৰেল হৈ পৰিছে তেওঁৰ হৃদয়স্পৰ্শী ভিডিঅ’। য’ত কাব্য মাৰাণে পিছলৈ ঘূৰি চকুপানী মচি থকা দেখা যায়। ইয়াৰ পিছত তেওঁ জোৰকৈ কান্দোন বন্ধ কৰিবলৈ চেষ্টা কৰিলে। কিন্তু নোৱাৰিলে। কাব্যই চকুলো ভৰা অৱস্থাৰে হাত চাপৰি বজাই দলটোক উৎসাহিত কৰিবলৈ নাপাহৰিলে। ইয়াকে কোৱা হয় স্প’ৰ্টছমেন স্পিৰিট।
A season to be proud of 🧡#KKRvSRH #IPLonJioCinema #IPLFinalonJioCinema pic.twitter.com/rmgo2nU2JM
— JioCinema (@JioCinema) May 26, 2024
উল্লেখ্য যে যি বিধ্বংসী বেটিং অৰ্ডাৰৰ সহায়ত ছানৰাইজাৰ্ছ হায়দৰাবাদে ২০২৪ আই পি এলত অদমনীয় প্ৰদৰ্শন আগবঢাই আহিছিল, সেই বেটিং অৰ্ডাৰেই ফাইনেলত ব্যৰ্থ কৰিছিল। কলকাতা নাইট ৰাইডাৰ্ছৰ বলাৰসকলে প্লে অফৰ দুয়োখন মেচতে হায়দৰাবাদৰ বেটিং অতি সাধাৰণ স্তৰলৈ অৱনমিত কৰি তোলে।
Will never forgive KKR for making Kavya Maran Cry 💔
— Mohit (@mohit12j) May 26, 2024
কোৱালিফায়াৰ ৱানৰ পিছত আই পি এলৰ অন্তিমখন খেলত হায়দৰাবাদৰ বেটছমেনসকলক কন্দুৱাইহে এৰিলে মিচেল ষ্টাৰ্ক, আন্দ্ৰে ৰাছেল বাহিনীয়ে। দেওবাৰে কেকেআৰৰ বলাৰৰ পৰাক্ৰমত ১৮.৩ অভাৰত মাত্ৰ ১১৩ ৰান সংগ্ৰহ কৰি অল আউট হয় ছানৰাইজাৰ্ছে। এইটোৱেই হৈছে আই পি এলৰ ফাইনেলৰ ইতিহাসত সৰ্বনিম্ন স্ক’ৰ।