বিপদত ভাৰতীয় শিবিৰঃ তৃতীয় টেষ্টৰ পৰা বাহিৰ ৰাহুল, দললৈ পাডিকাল

ইংলেণ্ডৰ বিৰুদ্ধে চলিত টেষ্ট শৃংখলাত আঘাতৰ সমস্যাই বাৰুকৈয়ে জুৰুলা কৰিছে ভাৰতীয় দলক। আঘাতৰ বাবে দ্বিতীয় টেষ্টৰ পৰা বাদ পৰা দলৰ নিৰ্ভৰযোজ্ঞ তাৰকা কে এল ৰাহুল তৃতীয় টেষ্টৰ পৰাও বাদ পৰিছে।

আঘাতৰ সমস্যাৰ সৈতে যুঁজি থকা ৰাহুলক শৃংখলাৰ বাকী তিনিখন টেষ্টৰ বাবে ঘোষিত দলত স্থান দিয়া হৈছিল যদিও তৃতীয় টেষ্টত উপলব্ধ হ’ব নে নহ’ব সেই সন্দৰ্ভত কোনো নিশ্চয়তা নাছিল।

অৱশেষত আজি বিচিচিআই- য়ে ৰাহুল ৰাজকোটত অনুষ্ঠিত হ’বলগীয়া তৃতীয়খন টেষ্টৰ পৰা বাহিৰ হোৱা বুলি নিশ্চিত কৰে। ৰাহুলৰ স্থানত উদীয়মান বেটাৰ দেৱদত্ত পাডিকলক দললৈ আমন্ত্ৰণ জনোৱা হৈছে।

উল্লেখ্য যে, শেহতীয়াকৈ প্ৰথম শ্ৰেণীৰ ক্ৰিকেটত ধাৰাবাহিকভাৱে উন্নত প্ৰদৰ্শন আগবঢ়াই আহিছে পাডিকালে। চলিত ৰঞ্জি ট্ৰফীত পাডিকালে ৪ খন মেচত তিনিটা শতকসহ ৫৫৬ ৰাণ সংগ্ৰহ কৰিছে।

ইংলেণ্ড লায়ন্সৰ বিৰুদ্ধেও পাডিকালে আগবঢ়াইছিল প্ৰশংসনীয় প্ৰদৰ্শন। এনে ধাৰাবাহিকতাৰ সুবাদতে নিৰ্বাচকৰ আস্থা জয় কৰিছে উদীয়মান তাৰকাগৰাকীয়ে। অৱশ্যে মূল একাদশত পাডিকালে সুযোগ পাব যে, তাৰ কোনো নিশ্চয়তা নাই।