কাইলৈ পুনৰ অখিল গগৈক গুৱাহাটীৰ NIAৰ আদালতত হাজিৰ কৰাব

বৃহস্পতিবাৰে অৰ্থাৎ ২৬ ডিচেম্বৰত পুনৰ অখিল গগৈক NIA ৰ আদালতত হাজিৰ কৰা হ’ব। এই উদ্দেশ্যে আজি অতি গোপনে দিল্লীৰ পৰা কৃষক নেতা অখিল গগৈক গুৱাহাটীলৈ অনা হৈছে। বিয়লি বিমানেৰে গুৱাহাটীলৈ অনা হৈছে কৃষক নেতাগৰাকীক।

উল্লেখযোগ্য যে সমগ্ৰ ৰাজ্যতে নাগৰিকত্ব সংশোধনী আইন বিৰোধিতাৰে উত্তাল প্ৰতিবাদ চলি থকাৰ মাজতে যোৱা ১২ ডিচেম্বৰত কৃষক নেতা অখিল গগৈ যোৰহাটৰ পৰা আৰক্ষীয়ে গ্ৰেপ্তাৰ কৰিছিল।

ইয়াৰ পিছতে ১৪ ডিচেম্বৰত NIA এ অখিল গগৈৰ বিৰুদ্ধে গোচৰ ৰুজু কৰিছিল। সংস্থাটোৱে দাখিল কৰা এজাহাৰত কৃষক নেতা গৰাকীক মাওবাদী সজোৱাৰ লগতে তেওঁৰ বিৰুদ্ধে কেইবাটাও বে-আইনী কাৰ্যকলাপ প্ৰতিৰোধ আইনৰ ধাৰা জাপি দিছিল। আৰু ১৬ ডিচেম্বৰত গগৈক NIAয়ে গ্ৰেপ্তাৰ কৰিছিল।

১৭ ডিচেম্বৰত গুৱাহাটীৰ চানমাৰিত থকা NIAৰ আদালতত অখিল গগৈক হাজিৰ কৰোৱাৰ পিছত ২০ দিনৰ বাবে জিম্মাত বিচাৰিছিল যদিও আদালতে তেওঁক ১০ দিনৰ জিম্মাত ৰখাৰ নিৰ্দেশ দিছিল।