চীনা সৈন্যৰ পৰা মুক্ত হ’ব নেকি লাডাখৰ গাৱলান উপত্যকা! : কি ক’লে ভাৰতীয় সেনাই

লাডাখৰ ভাৰত-চীন সীমান্তৰ গালৱান উপত্যকাৰ পৰা সৈন্য বাহিনী পিছুৱাই নিছে চীনে। ভাৰতীয় সেনা সূত্ৰই প্ৰকাশ কৰিছে এই কথা।

ভাৰতীয় সেনাৰ সূত্ৰৰ মতে বুধবাৰে চীনে গালৱান উপত্যকাৰ পৰা সেনা প্ৰত্যাহাৰ প্ৰায় সম্পূৰ্ণ কৰিছে।

অৱশ্যে চীন সেনাৰ এটা পেট্ৰিলং পইণ্টহে উঠাই নিবলৈ এতিযাও বাকী আছে। ভাৰতীয় সেনা সূত্ৰৰ অনুসৰি কাইলৈ চীনে উক্ত পেট্ৰিলং পইণ্টটো উঠাই নিয়াৰ কথা।

ইয়াৰ লগে লগে গালৱান উপত্যকাৰ পৰা দুয়োপক্ষৰে সেনা প্ৰত্যাহাৰ সম্পূৰ্ণ হ’ব।

সেনা সূত্ৰৰ মতে গালৱান উপত্যকাৰ পৰা চীনে সেনা প্ৰত্যাহাৰ কৰিলেও পাংগং হ্ৰদ অঞ্চলৰ ফিঙ্গাৰ পইণ্টসমূহৰ পৰা চীনে সেনা প্ৰত্যাহাৰ কৰা নাই।

ৰাষ্ট্ৰীয় নিৰাপত্তা উপদেষ্টা(এন এছ এ) অজিত ডোভালে চীনৰ বৈদেশিক মন্ত্রীৰ সৈতে হোৱা ভিডিঅ’ বৈঠকত ২ কিলোমিটাৰ বাফাৰ জ’ন এলেকাত কোনো দেশেৰে সৈন্য থাকিব নোৱাৰিব বুলি সিদ্ধান্ত গ্ৰহণ কৰা হৈছিল।

ইয়াৰ পিছতে চীনে গালৱান উপত্যকাৰ পৰা সেনা প্ৰত্যাহাৰ কৰিবলৈ আৰম্ভ কৰে।

উল্লেখ্য যে উক্ত অঞ্চলতে ১৫ জুনত দুয়োপক্ষৰ সৈন্যৰ মাজত ৰক্তক্ষয়ী সংঘৰ্ষৰ সংঘটিত হৈছিল, য’ত ২০ জনকৈ ভাৰতীয় সৈন্য নিহত হৈছিল।

ইফালে গোগৰা অঞ্চলৰ পৰাও চীনে সেনা প্ৰত্যাহাৰ কৰিছে বুলি জনাইছে ভাৰতীয় সেনাই।

অহা বৃহস্পতিবাৰে উক্ত অঞ্চলৰ পৰা সেনা প্ৰত্যাহাৰৰ কাম সম্পূৰ্ণ হ’ব বুলি জানিব পৰা গৈছে।

উল্লেখ্য যে, দেওবাৰে চীনৰ বৈদেশিক মন্ত্ৰীৰ সৈতে  হোৱা এন এছ এ ডোভালৰ বৈঠকত গালৱান উপত্যকাৰ পৰা সেনা প্ৰত্যাহাৰ কৰিবলৈ সন্মত হ’লেও পাংগং অঞ্চলৰ পৰা সেনা প্ৰত্যাহাৰ কোনো আশ্বাস দিয়া নাছিল চীনে।