জটিল ৰোগত আক্ৰান্ত হৈ দুবছৰ ধৰি বিচনাত পৰি আছে আল্পনা; উন্নত চিকিৎসাৰ সহায় ভিক্ষা পৰিয়ালৰ

দুবছৰ ধৰি বিচনাত পৰি আছে অল্পনা বৰগোঁহাই নামৰ এগৰাকী ৰোগাক্ৰান্ত মহিলা।

অতি দৰিদ্ৰ পৰিয়ালয়টোৱে উন্নত চিকিৎসাৰ বাবে নিব পৰা নাই ডিব্ৰুগড়স্থিত অসম মেডিকেল কলেজলৈ।

পৰিয়ালটোৰ শেষ ভৰসা এতিয়া শিৱসাগৰ সমষ্টিৰ বিধায়ক ৰাইজৰ নেতা অখিল গগৈ।

কন্যাৰ লগতে বিচনাত পৰি থকা মাতৃৰ জীৱন ভিক্ষা বিধায়ক অখিল গগৈলৈ।

উন্নত চিকিৎসাৰ বাবে সহায়ৰ হাত আগবঢ়াবলৈ অনুৰোধ এই দুৰ্ভগীয়া পৰিয়ালটোৰ।

শিৱসাগৰ জিলাৰ মগৰাহাট দোলাকাষৰীয়া গাঁৱৰ প্ৰশান্ত বৰগোঁহাইৰ পত্নী অল্পনা বৰগোঁহাই এক জটিল ৰোগত আক্ৰান্ত হৈ প্ৰায় দুবছৰ ধৰি বিচনাত পৰি আছে।

দৰিদ্ৰ পৰিয়ালটোৱে শিৱসাগৰত তেওঁৰ চিকিৎসা কৰিছিল যদিও আৰোগ্য লাভ নকৰাত চিকিৎসকে ডিব্ৰুগড়ৰ অসম মেডিকেল কলেজলৈ নিবলৈ পৰামৰ্শ দিয়ে।

কিন্তু দুবেলা দুমুঠি খাবলৈ হাহাকাৰ কৰিবলগীয়া এই দুখীয়া পৰিয়ালটোৱে অৰ্থৰ অভাৱত নিব পৰা নাই ডিব্ৰুগড়লৈ। যাৰ বাবে এইদৰে দুবছৰে বিচনাতে পৰি আছে  মহিলাগৰাকী।

আজি চিতু বৰুৱাৰ নেতৃত্বত বীৰ লাচিত সেনাৰ এটা সঁজাতি দলে প্ৰশান্ত বৰগোঁহাইৰ ঘৰত উপস্থিত হৈ পৰিয়ালটোক আৰ্থিক সাহায্যৰ লগতে কিছু পৰিমাণে খাদ্য সামগ্ৰী প্ৰদান কৰে।

তেওঁলোকে লগতে অতি সোনকালে অল্পনা বৰগোঁহাইৰ উন্নত চিকিৎসাৰ ব্যৱস্থা কৰি দুৰ্ভগীয়া পৰিয়ালটোক সহায় কৰিবলৈ অসম চৰকাৰ, মুখ্যমন্ত্ৰী, স্বাস্থ্যমন্ত্ৰী তথা শিৱসাগৰ সমষ্টিৰ বিধায়ক অখিল গগৈক অনুৰোধ জনায়।