মহাকাব্যিক অধ্যায়ৰ পৰিসমাপ্তি! ক্ৰিকেট ইতিহাসৰ সৰ্বকালৰ শ্ৰেষ্ঠ অলৰাউণ্ডাৰ কিংবদন্তি ছাৰ গেৰী ছ’বাৰ্ছৰ দেহাৱসান

আকাশৰ পৰা ক্ৰিকেট ইতিহাসৰ অন্যতম উজ্জ্বল নক্ষত্ৰটো খহি পৰিল। ক্ৰিকেটৰ সৰ্বকালৰ শ্ৰেষ্ঠ অলৰাউণ্ডাৰ ক্ৰিকেট জগতৰ জীৱন্ত কিংবদন্তি ছাৰ গাৰ্ফিল্ড ছ’বাৰ্ছ আৰু নাই। ৮৯ বছৰ বয়সত তেওঁ শেষ নিশ্বাস ত্যাগ কৰিছে। তেওঁৰ মৃত্যুৰ লগে লগে অন্ত পৰিল ক্ৰিকেট মহাকাব্যৰ এক সোণালী অধ্যায়ৰ। ক্ৰিকেটৰ খেলপথাৰত তেওঁ যি কৰি দেখুৱাইছে সেয়া আধুনিক ক্ৰিকেটৰ যুগতো সাধুকথাৰ দৰে শুনা যায়।

১৯৩৬ চনৰ ২৮ জুলাইত বাৰ্বাডোছত জন্মগ্ৰহণ কৰা এই ক্ৰিকেট কিংবদন্তিয়ে খেলপথাৰত অল-ৰাউণ্ডাৰৰ সংজ্ঞা সলনি কৰিছিল। দমনীয় বাওঁহতীয়া বেটিঙেৰে যিদৰে বিপক্ষৰ বলিং লাইনআপ ধ্বংস কৰি দিছিল, সেইদৰে বলিঙৰ ক্ষেত্ৰতো তেওঁ সমানেই মাৰাত্মক আছিল।

কেতিয়াবা একেখন মেচতে তেওঁ বাওঁহাতেৰে নিখুঁত মধ্যমীয়া গতিৰে বলিং কৰিছিল আৰু তাৰ খন্তেক পিছতে আঙুলিৰ পাকেৰে স্পীন বলিং কৰিছিল – দুয়োটা অৱতাৰতে তেওঁ বিপক্ষৰ বেটছমেনৰ বুকু কঁপাই তুলিছিল। কেৱল বেটিং বা বলিং নহয়, ফিল্ডাৰ হিচাপেও তেওঁৰ চিতা বাঘৰ দৰে ক্ষিপ্ৰতাই তেওঁক ক্ৰিকেটৰ ইতিহাসৰ প্ৰথমজন ‘সম্পূৰ্ণ ক্ৰিকেটাৰ’ৰ মৰ্যাদা প্ৰদান কৰিছিল।

মাত্ৰ ১৭ বছৰ বয়সতে ৱেষ্ট ইণ্ডিজৰ মেৰুণ জাৰ্চি পিন্ধি টেষ্ট ক্ৰিকেটত অভিষেক ঘটিছিল এই বিস্ময় বালকৰ। তাৰ পিছত তেওঁ নিজৰ কেৰিয়াৰত দেশৰ হৈ ৯৩খন টেষ্ট মেচ খেলিছিল। তেওঁ ৫৭.৭৮ ৰানৰ চকু কপালত তুলিব পৰা গড়েৰে ৮,০৩২ ৰান সংগ্ৰহ কৰে, য’ত আছে ২৬টা নান্দনিক শতক। আৰু তেওঁ বলিঙতো ২৩৫টা উইকেট দখল কৰে। স্লিপ বা ক্ল’জ ইন ফিল্ডিঙত তেওঁৰ নিপুন দুখন হাতে ১০৯টা কেচ কৰায়ত্ত কৰিছিল। আধুনিক ক্ৰিকেটত এজন ক্ৰিকেটাৰে তিনিওটা ফৰ্মেটতে খেলিবলৈ সংগ্ৰাম কৰিবলগীয়া হোৱাৰ বিপৰীতে ছয় দশক পূৰ্বে গেৰী ছ’বাৰ্ছে তিনিওটা শাখাতে বিশ্ব ক্ৰিকেটত শাসন কৰিছিল।

ছ’বাৰ্ছৰ কেৰিয়াৰৰ দুটা ঘটনা চিৰদিনৰ বাবে ক্ৰিকেট অনুৰাগীৰ মনত খোদিত হৈ থাকিব। প্ৰথমটো আছিল ১৯৫৮ চনত পাকিস্তানৰ বিৰুদ্ধে তেওঁৰ নট আউট ৩৬৫ ৰানৰ মহাকাব্যিক ইনিংছ। সেই সময়ত এইটোৱেই আছিল টেষ্ট ক্ৰিকেটৰ ইতিহাসত সৰ্বাধিক ব্যক্তিগত স্ক’ৰ।

আৰু দ্বিতীয়টো ঘটনা ঘটিছিল ঠিক এদশক পিছত, ১৯৬৮ চনত। প্ৰথম শ্ৰেণীৰ ক্ৰিকেটত নটিংহামশ্বাৰৰ হৈ খেলি থকাৰ সময়ত তেওঁ গ্লেমাৰগনৰ বলাৰ মেলকম নেছৰ অভাৰত ছটা বলত ৬টা ছয় মাৰিছিল। সেইটোৱেই আছিল এটা অভাৰত প্ৰথম ৩৬ ৰানৰ বিশ্ব অভিলেখ। সেই মুহূৰ্তটো আজিও ক্ৰিকেট জগতৰ অন্যতম বিৰল দৃশ্য বুলি গণ্য কৰা হয়।

দীৰ্ঘদিন ধৰি ৱেষ্ট ইণ্ডিজ ক্ৰিকেট দলটোক সফলতাৰে নেতৃত্ব দি আহিছে ছাৰ গেৰীয়ে। কেৱল কেৰিবিয়ান দ্বীপপুঞ্জৰ নহয়, সমগ্ৰ বিশ্বৰ পৰৱৰ্তী প্ৰজন্মৰ ক্ৰিকেটাৰসকলৰ বাবেও তেওঁ আছিল এক প্ৰেৰণা। তেওঁৰ পৰিসংখ্যাৰ দ্বাৰা তেওঁক বিচাৰ কৰাটো অসম্ভৱ। কেৱল বাইশ গজত থিয় হৈ থাকি মেচৰ ভাগ্য সলনি কৰাৰ তেওঁৰ অলৌকিক ক্ষমতাই ভৱিষ্যতৰ সকলো অলৰাউণ্ডাৰৰ বাবে শেষ শব্দ হৈ পৰিল। কপিল দেৱৰ পৰা জেক কালিছলৈকে – এই বাৰ্বাডোছৰ ৰাজকুমাৰেই আছিল একমাত্ৰ মাপকাঠী যাৰ দ্বাৰা যিকোনো অল-ৰাউণ্ডাৰক বিচাৰ কৰা হয়।

ক্ৰিকেটত তেওঁৰ অবিস্মৰণীয় অৱদানৰ বাবে তেওঁক ব্ৰিটিছ ৰাজ পৰিয়ালে ‘নাইটহুড’ উপাধিৰে সন্মানিত কৰিছিল। উইজডেনৰ ‘ক্ৰিকেটাৰ্ছ অৱ দ্য চেঞ্চুৰী’ৰ তালিকাতো তেওঁৰ নাম জিলিকি উঠিছিল। আই চি চিৰ ‘হল অৱ ফেম’তো সন্মানেৰে নিজৰ স্থান দখল কৰে।

আজি ছাৰ গেৰী ছ’বাৰ্ছে কায়িক জীৱনৰ পৰা বিদায় মাগিলেও ক্ৰিকেটৰ অস্তিত্ব থকালৈকে ডন ব্ৰেডমেনৰ সৈতে ছাৰ গাৰ্ফিল্ড ছ’বাৰ্ছৰ নাম ক্ৰিকেট বাইবেলত অমৰ হৈ থাকিব।