লিঅ’নেল মেছিক আৰ্জেণ্টিনাৰ দুৰ্বলতা আখ্যা ৱেইন ৰুনীৰ; মেচৰ পূৰ্বে ইংলেণ্ডক সতৰ্কবাণী মিকাহ ৰিচাৰ্ডছৰ

পেছাদাৰী ফুটবল জীৱনত প্ৰথমবাৰৰ বাবে ৰাষ্ট্ৰীয় দল আৰ্জেণ্টিনাৰ হৈ ইংলেণ্ডৰ বিৰুদ্ধে খেলপথাৰত নামিবলৈ সাজু হোৱা লিঅ‘নেল মেছিক লৈ ক্ৰীড়া বিশেষজ্ঞসকলৰ মাজত ব্যাপক চৰ্চা আৰু কৌশলগত বিশ্লেষণ আৰম্ভ হৈছে। বিবিচি স্প‘ৰ্টছৰ এক অনুষ্ঠানত ইংলেণ্ডৰ অন্যতম শ্ৰেষ্ঠ প্ৰাক্তন খেলুৱৈ ৱেইন ৰুনীয়ে ডিফেণ্ডিং চেম্পিয়ন আৰ্জেণ্টিনাৰ বাবে মেছি এক প্ৰকাৰৰ দুৰ্বলতা হিচাপে পৰিগণিত হ‘ব পাৰে বুলি মন্তব্য কৰিছে। ৰুনীৰ মতে মেছিয়ে প্ৰতিৰক্ষণত সহায় কৰিবলৈ পাছলৈ ঘূৰি নাহে, আৰু ইংলেণ্ডৰ খেলুৱৈসকলে এই সুযোগৰ সদব্যৱহাৰ কৰিবলৈ স্মাৰ্ট কৌশল অৱলম্বন কৰিব লাগিব।

প্ৰতিৰক্ষণৰ দিশৰ পৰা তেওঁ আৰ্জেণ্টিনাৰ বাবে এক দুৰ্বলতা হ‘ব পাৰে বুলি উল্লেখ কৰি ৰুনীয়ে অৱশ্যে মেছিৰ আক্ৰমণাত্মক শৈলীৰ ভূয়সী প্ৰশংসা কৰে। বিবিচি স্প‘ৰ্টছৰ আলোচনাত তেওঁ কয় যে মেছিয়ে পাছলৈ দৌৰি নাহে যদিও তেওঁৰ খেলত ইংলেণ্ডৰ জুড বেলিংহামৰ দৰে গুৰুত্বপূৰ্ণ মুহূৰ্ত আৰু গুণগত মান দেখা যায়। মেছিৰ আটাইতকৈ ডাঙৰ শক্তি হৈছে তেওঁৰ সিদ্ধান্ত গ্ৰহণৰ ক্ষমতা। খেলৰ সঠিক সময়ত তেওঁ সক্ৰিয় হৈ উঠে আৰু সঠিক সিদ্ধান্ত লয়। ৰুনীয়ে কয় যে মেছিক মাৰ্ক কৰিবলৈ খেলুৱৈসকলৰ মাজত গভীৰ মনোযোগ আৰু উন্নত যোগাযোগৰ প্ৰয়োজন, বিশেষকৈ সতীৰ্থসকলৰ মাজত স্থান নিৰ্ধাৰণৰ ক্ষেত্ৰত এক সুন্দৰ বুজাবুজি থকাটো অতি আৱশ্যক।

সাম্প্ৰতিক সময়ত ইংলেণ্ড দলত কাৰিকৰীভাৱে অধিক নিপুণ খেলুৱৈ আছে আৰু জুড বেলিংহাম বৰ্তমান নিজৰ শ্ৰেষ্ঠ ফৰ্মত আছে। থ্ৰী লায়ন্স খ্যাত ইংলেণ্ড দলে আৰ্জেণ্টিনাক দৌৰত অতিক্ৰম কৰিব পাৰে বুলি ধাৰণা কৰা হৈছে যদিও ৰুনীৰ প্ৰাক্তন সতীৰ্থ মিকাহ ৰিচাৰ্ডছে হেৰী কেইনৰ নেতৃত্বাধীন দলটোক মেছিৰ পৰা সাৱধান হ‘বলৈ সকীয়াই দিছে। ৰিচাৰ্ডছৰ মতে ইংলেণ্ডে আৰ্জেণ্টিনাক দৌৰত চেৰ পেলাব পাৰিলেও তেওঁলোকৰ হাতত মেছিৰ দৰে জিনিয়াছ খেলুৱৈ আছে আৰু সমগ্ৰ দলটোৱে কেৱল মেছিৰ বাবেই খেলে, সেয়েহে সকলোৱে এই মেচখনক লৈ উৎসাহিত হোৱা উচিত।

ৰুনীৰ সৈতে একেটা পেনেলতে অংশগ্ৰহণ কৰি ৰিচাৰ্ডছে কয় যে মেছিক মাৰ্ক কৰাটো প্ৰায় অসম্ভৱ কাৰণ তেওঁ প্ৰতিৰক্ষণলৈ ঘূৰি নাহে বৰঞ্চ খেলপথাৰৰ এনে কিছুমান সৰু স্থানত অৱস্থান কৰে য‘ত তেওঁ থকাটো সাধাৰণতে আশা কৰা নাযায়। সঠিক সময়ত সক্ৰিয় হৈ উঠা মেছিৰ শ্ৰেষ্ঠ কৌশল, স্থানৰ প্ৰতি থকা সজাগতা আৰু দুৰ্দান্ত শ্বট লোৱাৰ ক্ষমতাৰ কথা ৰিচাৰ্ডছে প্ৰশংসা কৰে।

বৰ্তমান দুয়োটা দলেই এই গুৰুত্বপূৰ্ণ মেচখনৰ বাবে নিজৰ প্ৰস্তুতি অব্যাহত ৰাখিছে। ফুটবল বিশ্বৰ অন্যতম শ্ৰেষ্ঠ খেলুৱৈগৰাকীয়ে প্ৰথমবাৰৰ বাবে ইংলেণ্ডৰ সন্মুখীন হ‘বলৈ গৈ থকা এই সময়ত, প্ৰাক্তন ক্ৰীড়াবিদসকলৰ এনে কৌশলগত বিশ্লেষণ আৰু সতৰ্কবাণীয়ে খেলখনৰ প্ৰতি অনুৰাগীসকলৰ উৎকণ্ঠা অধিক বৃদ্ধি কৰিছে। আগন্তুক সময়ত দুয়োটা দলে কেনে কৌশল অৱলম্বন কৰে, সেয়া ফুটবল প্ৰেমীসকলৰ বাবে আকৰ্ষণৰ মূল কেন্দ্ৰবিন্দু হ‘ব।