বিশ্ব ফুটবলৰ অবিসম্বাদী সম্ৰাট; সপ্তমবাৰলৈ বেলন ডি অ’ৰ পুৰস্কাৰ জিনিলে ফুটবল তাৰকা মেছিয়ে

আৰ্জেণ্টিনাৰ তাৰকা ফুটবলাৰ লিঅ’নেল মেছিয়ে অভিলেখ সংখ্যক সপ্তমবাৰৰ বাবে ফুটবল বিশ্বৰ ব্যক্তিগত শীৰ্ষ পুৰস্কাৰ বেলন ডি অ’ৰ পুৰস্কাৰ বিজয়ী হিচাপে বিবেচিত হৈছে। আনহাতে এলেক্সিয়া পুটেলাছে মহিলাৰ শাখাত বেলন ডি অ’ৰ পুৰস্কাৰ অৰ্জন কৰিছে।

মঙ্গলবাৰে পুৱতিনিশা বেলন ডি অ’ৰ পুৰস্কাৰ বিজয়ীৰ নাম ঘোষণা কৰাৰ পিছতে পুৰস্কাৰ জয়ী মেছিয়ে কয়, “মই বহুত সুখী, সঁচাকৈয়ে বহুত সুখী। মই সঁচাকৈয়ে যুঁজ অব্যাহত ৰাখিব বিচাৰো আৰু নতুন উদ্দেশ্যত উপনীত হ’ব বিচাৰো। মই আৰু কিমান বছৰ খেলিব পাৰোঁ নাজানো কিন্তু মই সঁচাকৈয়ে নিজকে উপভোগ কৰি আছো। মই পেৰিছ, আৰ্জেণ্টিনা আৰু বাৰ্চিলোনাৰত মোৰ দলৰ সতীৰ্থসকলক ধন্যবাদ জনাইছো।”

৩৪ বছৰীয়া তাৰকা খেলুৱৈ গৰাকীয়ে চাৰিবাৰ মুখ্য আন্তঃৰাষ্ট্ৰীয় টুৰ্নামেণ্টৰ ফাইনেলত পৰাজিত হোৱাৰ পিছত এই বৰ্ষৰ জুলাইত আৰ্জেণ্টিনাক কোপা আমেৰিকা জয়ত মুখ্য ভূমিকা লয়। তদুপৰি স্পেনিছ ক্লাৱ বাৰ্চিলোনাৰ হৈ তেওঁ কোপা ডেল ৰে’ জয়ী হয়।

আৰ্জেণ্টাইন তাৰকা গৰাকীয়ে বেলন ডি অ’ৰ লাভৰ পিছত নিকটতম প্ৰতিদ্বন্দী ৰবাৰ্ট লেভানডস্কিকো উজ্জ্বল প্ৰদৰ্শনৰ বাবে প্ৰশংসা কৰে। “ৰবাৰ্ট, আপুনি আপোনাৰ বেলন ডি অ’ৰৰ যোগ্য। যোৱা বছৰ আপুনিয়েই এই বঁটাৰ প্ৰকৃত বিজয়ী আছিল, সকলোৱে একেমুখে এই কথা স্বীকাৰ কৰিছিল” মেছিয়ে কয়।

উল্লেখ্য যে, ২০২০ বৰ্ষৰ বেলন ডি অ’ৰ সন্মান ক’ভিদ মহামাৰীৰ পৰিপ্ৰেক্ষিতত প্ৰদান কৰা হোৱা নাছিল।

এইবাৰৰ সৈতে লিঅ’নেল মেছিয়ে সপ্তম বাৰৰ বাবে এই সন্মান লাভ কৰিছে। ইয়াৰ পূৰ্বে তেওঁ ২০০৯, ২০১০, ২০১১ আৰু ২০১২ চনত ক্ৰমাগত চাৰিবাৰ, ২০১৫ আৰু ২০১৯ চনত বেলন ডি অ’ৰ লাভ কৰিছিল।

আনহাতে মহিলাৰ শাখাত ২৭ বছৰীয়া মিডফিল্ডাৰ পুটেলাছে বেলন ডি অ’ৰ লাভ কৰে। পুটেলাছে এই বৰ্ষত বাৰ্চিলোনাক ট্ৰেবল জয় কৰাত গুৰুত্বপূৰ্ণ ভূমিকা পালন কৰিছিল। সামগ্ৰিক ভাৱে খেলুৱৈ গৰাকীয়ে বৰ্ষটোত ৪২ খন খেলত ২৬ টা গ’ল কৰাৰ লগতে ১৯ টা গলৰ ক্ষেত্ৰত এচিষ্ট কৰে। আগষ্টত তেওঁ উৱেফা মহিলা বৰ্ষৰ খেলুৱৈ হিচাপে মনোনীত হৈছিল।

পেৰিছৰ বঁটা প্ৰদান অনুষ্ঠানত পুটেলাছে কয়, “মই অতি আৱেগিক, এইটো এটা অতি বিশেষ মুহূৰ্ত। মই মোৰ সকলো সতীৰ্থক, বিশেষকৈ মোৰ বাৰ্চিলোনাৰ সতীৰ্থসকলক ধন্যবাদ জনাব বিচাৰো। মোৰ বাবে ই এক সামূহিক সফলতা।”

উল্লেখ্য যে, এই মুহূৰ্ত্বত বিশ্বৰ অন্যতম শ্ৰেষ্ঠ ফুটবলাৰ ক্ৰিষ্টিয়ানো ৰোনাল্ডোৱে ২০১০ চনৰ পিছত প্ৰথমবাৰৰ বাবে বেলন ডি অ’ৰত শীৰ্ষ তিনিজনৰ বাহিৰত স্থান লাভ কৰে। তালিকাত তেওঁ ষষ্ঠ স্থানত অৱস্থান কৰে।

বায়াৰ্ণ মিউনিখৰ ৰবাৰ্ট লেভানডস্কিয়ে “ষ্ট্ৰাইকাৰ অফ দা ইয়েৰ” জয়ী হয়। আনহাতে ইটালীৰ ষ্টপাৰ জিয়ানলুইগি ডোনাৰুমাই শ্ৰেষ্ঠ গ’লৰক্ষকৰ বঁটা লাভ কৰে। শ্ৰেষ্ঠ যুৱ খেলুৱৈৰ বাবে কোপা ট্ৰফী লাভ কৰে স্পেইন তথা বাৰ্চিলোনাৰ উদীয়মান তাৰকা পেদ্ৰীয়ে। ইফালে এই বৰ্ষৰ চেম্পিয়নচ্ লীগ বিজয়ী চেলছিয়ে শ্ৰেষ্ঠ ক্লাবৰ বঁটা লাভ কৰে।