লকডাউন: নিশা কৰ্তব্যৰত আৰক্ষীক চাহ বিতৰণ এৰ’মিকা টীৰ

এৰ’মিকা টীৰ স্বত্বাধিকাৰী ৰঞ্জিত বৰুৱাই লকডাউনৰ সময়ত কৰ্তব্যৰত আৰক্ষীৰ লোকসকলক চাহ বিতৰণ কৰি আহিছে।

দিনত দুই এক সদাশয় ব্যক্তিয়ে আৰক্ষীক চাহ বা আন খোৱা বস্তুৰ যোগান ধৰা দেখা যায়, কিন্তু বৰুৱাই ৰাতিও এই কাম কৰি আহিছে।

কেৱল সেয়াই নহয়, ব্যক্তিজনে প্ৰতিদিনে আৰক্ষীক নতুন নতুন চাহৰো সোৱাদ দি আহিছে। লাল চাহৰ পৰা মছলা চাহলৈকে প্ৰায় ২৫ বিধ চাহৰ সোৱাদ দিছে বৰুৱাই৷

প্ৰধান মন্ত্ৰী নৰেন্দ্ৰ মোদীয়ে কৰ’নাভাইৰাছৰ বিৰুদ্ধে ৩ মে’লৈকে বৰ্ধিত কৰা দ্বিতীয় পৰ্য্যায়ৰ লকডাউন আৰম্ভ হোৱাৰ পৰা বৰুৱাই প্ৰতিদিনে এই কাম কৰি আহিছে।

লকডাউনত সকলো দোকান-পোহাৰ বন্ধ হৈ থকাৰ ফলত সেৱাত নিয়োজিত আৰক্ষীৰ লোকসকল হঠাতে পানী এটুপি পোৱাৰ ক্ষেত্ৰতো বহু সময়ত অসুবিধাত পৰে।

অসমত এতিয়ালৈকে ৩৪জন ক’ভিড-১৯ আক্ৰান্ত চিনাক্ত হৈছে। তাৰে এজনৰ ইতিমধ্যে মৃত্যু ঘটিছে।

ৰাজ্যখনত যোৱা দুদিনত পাঁচগৰাকী লোক ক’ভিড-১৯ৰ পৰা সুস্থ হৈছে আৰু তেওঁলোকক চিকিৎসালয়ৰ পৰা যাবলৈ দিয়া হৈছে।

বৃ্হস্পতিবাৰলৈকে দেশত ১২,৩৮০গৰাকী ক’ভিড-১৯ ৰোগী চিনাক্ত হৈছে আৰু এই ৰোগত ৪১৪জনে প্ৰাণ হেৰুৱাইছে।

এতইয়ালৈকে ১৪৮৯ গৰাকী লোক চিকিৎসাৰ পিছত সুস্থ হৈছে আৰু তেওঁলোকক যাবলৈ দিয়া হৈছে।

ভাৰতত ক’ভিড-১৯ত মৃত্যুৰ হাৰ ৩.৩ শতাংশ। ইয়াৰ বিপৰীতে এতিয়ালৈকে আৰোগ্যৰ হাৰ ১২.০২ শতাংশ।