লোকসভাত ৮ জন বিৰোধী সাংসদৰ নিলম্বন প্ৰত্যাহাৰ হোৱাৰ সম্ভাৱনা

সংসদৰ বাজেট অধিৱেশনৰ প্ৰথম পৰ্যায়ত বিশৃংখল আচৰণৰ বাবে লোকসভাৰ পৰা নিলম্বিত হোৱা ৮ গৰাকী বিৰোধী সাংসদৰ নিলম্বন আজি অৰ্থাৎ মঙলবাৰে প্ৰত্যাহাৰ হোৱাৰ পূৰ্ণ সম্ভাৱনা আছে। লোকসভাৰ অধ্যক্ষ ওম বিৰলাৰ আহ্বানমৰ্মে অনুষ্ঠিত এখন বিশেষ বৈঠকত গ্ৰহণ কৰা সিদ্ধান্ত অনুসৰি এই নিলম্বন প্ৰত্যাহাৰৰ প্ৰস্তাৱটো সদনত আনুষ্ঠানিকভাৱে উত্থাপন কৰা হ‘ব বুলি সূত্ৰযোগে জানিব পৰা গৈছে।

প্ৰকাশিত তথ্য অনুসৰি, নিলম্বিত সাংসদসকলৰ ভিতৰত ৭ গৰাকী কংগ্ৰেছ দলৰ আৰু এগৰাকী চিপিএমৰ সাংসদ অন্তৰ্ভুক্ত আছে। উল্লেখ্য যে, বাজেট অধিৱেশনৰ প্ৰথম পৰ্যায়ত সদনত সৃষ্টি কৰা উত্তপ্ত পৰিস্থিতি আৰু বিশৃংখল আচৰণৰ বাবে এক প্ৰস্তাৱ গ্ৰহণ কৰি এই আঠগৰাকী সাংসদক সমগ্ৰ অধিৱেশনৰ বাবেই নিলম্বন কৰা হৈছিল। ইয়াৰ পিছতেই বিৰোধী দলসমূহে অধ্যক্ষগৰাকীক এই নিলম্বন প্ৰত্যাহাৰ কৰি সাংসদসকলক পুনৰ সদনলৈ উভতি অহাৰ সুযোগ দিবলৈ অহৰহ অনুৰোধ জনাই আহিছিল।

সূত্ৰই প্ৰকাশ কৰা অনুসৰি, অধ্যক্ষ ওম বিৰলাৰ সৈতে হোৱা বৈঠকত এক সৰ্বসন্মত সিদ্ধান্ত গ্ৰহণ কৰা হয়। এই সিদ্ধান্ত মৰ্মে বিৰোধী সাংসদসকলে সদনৰ মজিয়াত (Well of the House) প্ৰতিবাদ সাব্যস্ত কৰাৰ পৰা বিৰত থাকিব আৰু নিজকে সংযত কৰি ৰাখিবলৈ সন্মতি প্ৰকাশ কৰিছে। এই প্ৰতিশ্ৰুতিৰ পিছতেই অধ্যক্ষগৰাকীয়ে তেওঁলোকৰ শাস্তি ৰেহাই দিয়াৰ সপক্ষে মত পোষণ কৰে। আজি লোকসভাত এই প্ৰস্তাৱটো গৃহীত হোৱাৰ পিছতেই বিৰোধী সাংসদসকলে পুনৰ সংসদীয় কাম-কাজত স্বাভাৱিকভাৱে অংশগ্ৰহণ কৰিব পাৰিব বুলি আশা কৰা হৈছে।