কৰ’না: প্ৰধান মন্ত্ৰীৰ সাহায্য পুঁজিলৈ এমাহৰ দৰমহা আগবঢ়ালে লোকসভাৰ অধ্যক্ষ ওম বিৰলাই

লোকসভাৰ অধ্যক্ষ ওম বিৰলাই মঙলবাৰে কয় যে তেওঁ কৰ’না মহামাৰীলৈ লক্ষ্য ৰাখি প্ৰধান মন্ত্ৰীৰ সাহায্য পুঁজিলৈ তেওঁৰ এমাহৰ দৰমহা বৰঙণি হিচাপে আগবঢ়াব।

দেশত ইতিমধ্যে ৫০০তকৈয়ো অধিক লোক কৰ’নাত আক্ৰান্ত হৈছে আৰু ১১জন লোকৰ মৃত্যু ঘটিছে।

নিজৰ সিদ্ধান্তৰ কথা ঘোষণা কৰি অধ্যক্ষগৰাকীয়ে হিন্দীতে টুইট কৰি কয়,’’এই সংকটৰ সময়ত আমি একেলগে আছো। ভাৰতত COVID-19 মহামাৰীৰ বিৰুদ্ধে যুঁজ দিয়াৰ বাবে মই মোৰ এমাহৰ দৰমহা প্ৰধান মন্ত্ৰীৰ সাহায্য পুঁজিলৈ বৰঙণি হিচাপে আগবঢ়াম।‘’

भारत में कोरोना वायरस की महामारी से निपटने के लिए किए जा रहे प्रयासों के तहत प्रधानमंत्री राहत कोष में एक माह के वेतन का योगदान देता हूँ। हम सब इस कठिन घड़ी में एक साथ हैं।#coronavirusindia

— Lok Sabha Speaker (@loksabhaspeaker) March 24, 2020

ইয়াৰ মাজতে এক বিশেষ মুহূৰ্তত, লোকসভাৰ সদস্যসকলে সোমবাৰে কৰ’না ভাইৰাছৰ মোকবিলা কৰিবলৈ নিয়োজিত হৈ থকা চিকিৎসা বৃত্তিত জড়িতসকলকে ধৰি সকলোকে সদনত থিয় হৈ ধন্যবাদ জ্ঞাপন কৰে।

প্ৰধান মন্ত্ৰী নৰেন্দ্ৰ মোদী, গৃহ মন্ত্ৰী অমিত শ্বাহ আৰু বিত্ত মন্ত্ৰী নিৰ্মলা সীতাৰমনকে ধৰি সকলো সদস্যই অধ্যক্ষৰ সৈতে হাত চাপৰি বজাই ধন্যবাদ জ্ঞাপন কৰে।

সাধাৰণতে সদস্যসকলে ডেস্কত হাতেৰে চপৰিয়াই প্ৰশংসাসূচক ভাৱ প্ৰকাশ কৰে।