পেগাছাছ বিষয়কলৈ বিৰোধীৰ হুলস্থুলৰ মাজতে স্থগিত লোকসভা

বিৰোধী দলে পেগাছাছ বিতৰ্ককে ধৰি বিভিন্ন বিষয়কলৈ সদনৰ নিয়মীয়া কামকাজত বাধা দিয়াৰ বাবে আজি লোকসভাৰ কাৰ্যক্ৰম স্থগিত ৰাখিবলগীয়া হয়।

বিৰোধী দলৰ সদস্যসকলে দিনটোৰ কাৰ্যসূচী নিলগাই ৰাখি তেওঁলোকে উত্থাপন কৰা বিষয়সমূহ আলোচনা কৰাৰ বাবে  নিয়মাৱলী ২৬৭ৰ অধীনত প্ৰায় ১৫খন জাননী দিছিল।

বিৰোধী সদস্যসকলে শ্ল’গান দিয়াৰ লগতে সদনৰ মজিয়াৰ মাজলৈ আগবাঢ়ি যায়।

উল্লেখ্য যে সংসদৰ বৰ্ষাকালীন অধিৱেশনৰ সোমবাৰে আৰম্ভণিৰ দিনটোত বিৰোধীসকলে প্ৰধানমন্ত্ৰীক নতুন কেন্দ্ৰীয় মন্ত্ৰীসকলক পৰিচয় কৰাই দিয়াত বাধা দি হুলস্থুলৰ সৃষ্টি কৰিছিল।

সংসদৰ অধিৱেশনৰ প্ৰথমটো দিন কোনো কামকাজ অবিহনে সামৰণি পৰে কিয়নো বিৰোধী সংসদসকলে ফোন টেপিং বিষয়কলৈ অচলাৱস্থাৰ সৃষ্টি কৰে।

আনহাতে, আজিও সদনত বিৰোধীসকলে প্ৰায় অচলাৱস্থাৰ সৃষ্টি কৰাৰ পাছত অধ্যক্ষই দিনৰ ২ বজালৈ সদন স্থগিত কৰে।