১ নৱেম্বৰৰ পৰা সলনি হ’ব ঘৰতে ৰন্ধন গেছৰ চিলিণ্ডাৰ লাভ কৰাৰ নিয়ম, জানো আহক কি সেই নিয়ম
গেছ চিলিণ্ডাৰ এটাৰ বাবে কিমান যে হাবাথুৰি খাব লাগে।
বুকিং কৰাৰ পিছতো বহু সময়ত চিলিণ্ডাৰ আহি নাপায় হে নাপায়।
ইয়াৰ বিপৰীতে কেতিয়াবা গেছ বুকিং নকৰা জনেও বেঁকা পথৰে আমাৰ চকুৰ সন্মুখেৰেই চিলিণ্ডাৰ সৰকাই লৈ যোৱাৰ ঘটনাও ঘটি আহিছে।
এতিয়াৰে পৰা চিলিণ্ডাৰৰ চোৰাং বেহা ৰোধ কৰাৰ বাবে চৰকাৰে এক বিশেষ পদক্ষেপ গ্ৰহণ কৰিবলৈ অগ্ৰসৰ হৈছে।
সেই পদক্ষেপে আপুনি বুক কৰা চিলিণ্ডাৰটো আপোনাক নিদি আন কোনোৱাক বেছি দামত বিক্ৰী কৰি দিয়াৰ মুদা মাৰিব।
নতুন নিয়ম অনুসৰি গ্ৰাহক এজনে মোবাইল ফোনৰ জৰিয়তে চিলিণ্ডাৰ বুক কৰাৰ পিছতে তেওঁলৈ এটা OTP অৰ্থাৎ ৱান টাইম পাছৱৰ্ড আহিব।
চিলিণ্ডাৰ ডেলিভাৰী দিয়াৰ সময়ত ডেলিভাৰী দিয়া লোকজনে গ্ৰাহকৰ মোবাইল ফোনলৈ অহা OTP টো চাব আৰু সেয়া বুকিং কৰাৰ পিছত দিয়া OTP ৰ সৈতে মিলিলেহে গ্ৰাহকক চিলিণ্ডাৰ ডেলিভাৰী দিব।
ডেলিভাৰী অথেনটিকেছন কোড বা DAC নামেৰে আৰম্ভ কৰিবলগীয়া এই ব্যৱস্থাৰ ফলত এতিয়া এজন গ্ৰাহকৰ নামত আৱণ্টিত চিলিণ্ডাৰ আন গ্ৰাহকে ল’ব নোৱাৰিব।
সম্প্ৰতি ৰাজস্থানৰ জয়পুৰত পৰীক্ষামূলক ভাবে এই ব্যৱস্থা আৰম্ভ কৰাৰ পিছত ১ নৱেম্বৰৰ পৰা দেশৰ ১০০ খন বচা বচা চহৰত এই ব্যৱস্থা প্ৰচলন কৰা হ’ব।
পিছলৈ সমগ্ৰ দেশতে এই ব্যৱস্থা প্ৰৱৰ্তন কৰা হ’ব বুলি চৰকাৰী মুখপাত্ৰ এগৰাকীয়ে প্ৰকাশ কৰিছে।