ধন-জন একাউণ্টত সোমাল ১৫ লাখ টকা: প্ৰধানমন্ত্ৰীৰ প্ৰতিশ্ৰুতি পূৰণ বুলি কৰিলে খৰচ; তাৰ পিছত!

২০১৪ চনত চৰকাৰ গঠনৰ পূৰ্বে বৰ্তমানৰ প্ৰধানমন্ত্ৰী নৰেন্দ্ৰ মোদীয়ে দিছিল এক লোভনীয় আৰু বিখ্যাত প্ৰতিশ্ৰুতি। নিজৰ ভাষণত তেওঁ চৰকাৰ গঠন কৰিলে দেশৰ প্ৰতিজন ব্যক্তিৰ একাউণ্টত ১৫ লাখকৈ টকা সোমোৱাৰ প্ৰতিশ্ৰুতি দিছিল।

যোৱা বৰ্ষৰ আগষ্টত মহাৰাষ্ট্ৰৰ এজন কৃষকৰ ধন জন একাউণ্টত হঠাতে সোমাল ১৫ লাখ টকা। জ্ঞানেশ্বৰ ওটে নামৰ কৃষকজনে এই বৃহৎ পৰিমাণৰ ধনৰাশি লাভ কৰি আনন্দত আত্মহাৰা হৈ পৰিল।

সহজ-সৰল কৃষক ওটেই ধৰি ল’লে এইয়া প্ৰধানমন্ত্ৰী মোদীয়ে নিজৰ প্ৰতিশ্ৰুতি ৰাখিলে। মোদীৰ কৃপাতে তেওঁ লাভ কৰিলে ১৫ লাখ টকাৰ ধনৰাশি। ১৫ লাখ টকাৰ ‘অনুদান’ লাভ কৰি তেওঁ আনকি প্ৰধানমন্ত্ৰীলৈ এখন ‘ধন্যবাদ’ পত্ৰও লিখিছিল।

মহাৰাষ্ট্ৰৰ ঔৰঙ্গাবাদ জিলাৰ পাইথান তালুকাৰ বাসিন্দা জ্ঞানেশ্বৰ ওটে লগে লগে তেওঁৰ বেংক অফ বৰোদা একাউণ্টৰ পৰা এটা ঘৰ নিৰ্মাণৰ বাবে এই ১৫ লাখ টকাৰে ৯ লাখ টকা উলিয়াই আনে আৰু চৰম সন্তুষ্টিৰে এটি ঘৰো নিৰ্মাণ কৰে।

কিন্তু হঠাতে লাভ কৰা এই আনন্দৰ পাছত হঠাতেই লাগিল অথন্তৰ! ছয় মাহৰ পিছত তেওঁৰ মূৰত পৰিল ভয়ানক বজ্ৰপাত। ভাঙি পৰিল প্ৰধানমন্ত্ৰীলৈ ওপজা বিশ্বাসৰ দেৱাল।

ছয় মাহৰ পিছত ওটেলৈ বেংকৰ পৰা আহিল এখন অপ্ৰত্যাশিত জাননী। বেংকে প্ৰেৰণ কৰা এই জাননীত উল্লেখ কৰা হ’ল যে তেওঁৰ একাউণ্টত ভুলবশতঃ বৃহৎ পৰিমাণৰ ধন জমা কৰা হৈছে। লগতে, বেঙ্কে তেওঁক এই ধনৰাশি সম্পূৰ্ণৰূপে ঘূৰাই দিবলৈও নিৰ্দেশ দিয়ে।

এই অপ্ৰত্যাশিত জাননী লাভ কৰি ওটেৰ শিৰত সৰগ খহি পৰিল। দিশহাৰা হৈ পৰিল ওটে।

প্ৰকৃততে এই ধনখিনি পিম্পলৱাড়ী গ্ৰাম পঞ্চায়তক আৱণ্টন কৰা হৈছিল। চাৰি মাহৰ পিছত গ্ৰাম পঞ্চায়তে অনুভৱ কৰিলে যে ইয়াৰ ব্যৱহাৰৰ বাবে নিৰ্ধাৰিত ধন জ্ঞানেশ্বৰ ওটেৰ একাউণ্টত জমা কৰা হৈছে।

এই ঘটনা সন্দৰ্ভত জ্ঞানেশ্বৰ ওটেই কয় যে তেওঁ এই ধন কেৱল প্ৰধানমন্ত্ৰী মোডীয়ে তেওঁৰ একাউণ্টলৈ প্ৰেৰণ কৰা বুলি ভবা বাবেহে খৰচ কৰিছিল।

ইতিমধ্যে ওটেই বেঙ্কক ৬ লাখ টকা পৰিশোধ কৰিছে। কিন্তু ঘৰ নিৰ্মাণত খৰচ কৰা ৯ লাখ টকা পৰিশোধ কৰিবলৈ বাকী আছে।