মহাৰাষ্ট্ৰৰ চৰকাৰী চিকিৎসালয়ত মুকলি হ’ল ৫-ষ্টাৰ ৰেটিং ব্যৱস্থা
ৰাজহুৱা স্বাস্থ্যসেৱাৰ মানদণ্ড আৰু দায়বদ্ধতা উন্নত কৰাৰ এক বৃহৎ প্ৰচেষ্টা হিচাপে মহাৰাষ্ট্ৰ চৰকাৰে শুকুৰবাৰে ৰাজ্যখনৰ জনস্বাস্থ্য বিভাগৰ অধীনত থকা চিকিৎসালয়সমূহৰ বাবে এক ফাইভ-ষ্টাৰ ৰেটিং ব্যৱস্থা মুকলি কৰিছে। এই পদক্ষেপৰ মূল লক্ষ্য হৈছে নাগৰিকসকলক চৰকাৰী চিকিৎসালয়সমূহৰ এক নিকা মূল্যায়ন প্ৰদান কৰা আৰু লগতে স্বাস্থ্যসেৱা প্ৰতিষ্ঠানসমূহক তেওঁলোকৰ সেৱাৰ মান উন্নত কৰিবলৈ উৎসাহিত কৰা। জনস্বাস্থ্য বিভাগে এক চৰকাৰী প্ৰস্তাৱ জাৰি কৰি এই ব্যৱস্থাৰ সূচনা কৰিছে, য’ত চিকিৎসালয়সমূহক স্বাস্থ্যসেৱাৰ মূল সূচকসমূহৰ প্ৰদৰ্শনৰ ওপৰত ভিত্তি কৰি শূন্যৰ পৰা পাঁচটা তৰকালৈকে ৰেটিং প্ৰদান কৰা হ’ব।
চৰকাৰী নিৰ্দেশনা অনুসৰি, চিকিৎসালয়সমূহক পাঁচটা মূল মাপকাঠীৰ ওপৰত মূল্যায়ন কৰা হ’ব। এইবোৰ হৈছে স্বাস্থ্যসেৱাৰ উপলব্ধতা আৰু সঁহাৰি, ৰোগ নিৰ্ণয়ৰ সুবিধা আৰু অত্যাৱশ্যকীয় ঔষধৰ উপলব্ধতা, চিকিৎসালয়ৰ প্ৰদৰ্শন, চিকিৎসা সেৱাৰ মানদণ্ড, আৰু ৰোগীৰ সুবিধা আৰু মতামত। প্ৰতিখন চিকিৎসালয়ক দহটা গুণগত সূচকৰ ওপৰত ভিত্তি কৰি মূল্যায়ন কৰা হ’ব, আৰু প্ৰতিটো সূচকৰ বাবে আধা তৰকা বা হাফ-ষ্টাৰ থাকিব। সকলো নিৰ্ধাৰিত মাপকাঠী পূৰণ কৰা চিকিৎসালয়সমূহে পাঁচ-তৰকা ৰেটিং লাভ কৰিব, আনহাতে কোনো মাপকাঠী পূৰণ কৰিবলৈ ব্যৰ্থ হোৱা চিকিৎসালয়সমূহে কোনো তৰকা লাভ নকৰিব।
এই মূল্যায়নৰ সময়ত অন্ততঃ আশী শতাংশ বিশেষ সেৱাৰ উপলব্ধতা, চিকিৎসক আৰু কৰ্মচাৰীৰ উপস্থিতি, অত্যাৱশ্যকীয় ঔষধ, পৰীক্ষাগাৰ, এক্স-ৰে আৰু ইচিজি সুবিধাৰ নিচিনা গুৰুত্বপূৰ্ণ বিষয়বোৰ বিবেচনা কৰা হ’ব। ইয়াৰ উপৰিও চিকিৎসালয়ৰ পৰিষ্কাৰ-পৰিচ্ছন্নতা, খোৱা পানী, ৰোগীৰ সুবিধা আৰু টেলিফোনৰ জৰিয়তে সংগ্ৰহ কৰা মতামতকো গুৰুত্ব দিয়া হ’ব। জনস্বাস্থ্য বিভাগে বছৰত দুবাৰকৈ, জানুৱাৰী আৰু আগষ্ট মাহত শাৰীৰিক পৰিদৰ্শন আৰু চিকিৎসালয়ৰ তথ্য পৰীক্ষাৰ জৰিয়তে এই মূল্যায়ন কৰিব। চাৰিটা বা তাতকৈ অধিক তৰকা লাভ কৰা চিকিৎসালয়সমূহক স্বাস্থ্যসেৱাৰ উচ্চ মানদণ্ড বজাই ৰখাৰ বাবে স্বীকৃতি পত্ৰ প্ৰদান কৰা হ’ব।
বিষয়াসকলে জানিবলৈ দিয়া মতে, এই ষ্টাৰ ৰেটিং ব্যৱস্থাই সমগ্ৰ মহাৰাষ্ট্ৰৰ ছশ তেইশখন চৰকাৰী স্বাস্থ্যসেৱা প্ৰতিষ্ঠানক সামৰি ল’ব। ইয়াৰ ভিতৰত জিলা চিকিৎসালয়, সাধাৰণ চিকিৎসালয়, মহিলা চিকিৎসালয়, উপ-জিলা চিকিৎসালয়, গ্ৰাম্য চিকিৎসালয়, ট্ৰমা কেয়াৰ চেণ্টাৰ আৰু ইএছআই চিকিৎসালয়ো অন্তৰ্ভুক্ত আছে। এই ষ্টাৰ ৰেটিং ব্যৱস্থাৰ জৰিয়তে গুণগত মানদণ্ড স্থাপন কৰা, দায়বদ্ধতা বৃদ্ধি কৰা, চৰকাৰী চিকিৎসালয়সমূহৰ মাজত এক সুস্থ প্ৰতিযোগিতা গঢ়ি তোলা আৰু চৰকাৰী স্বাস্থ্যসেৱাৰ প্ৰতি ৰাইজৰ আস্থা বৃদ্ধি কৰাৰ প্ৰয়াস কৰা হৈছে।