শীঘ্ৰে টিভি ধাৰাবাহিকত নতুন ৰূপত দেখা যাব ভাৰতীয় দলৰ প্ৰাক্তন অধিনায়ক মহেন্দ্ৰ সিং ধোনীক

শীঘ্ৰে এক ব্যতিক্ৰমী ৰূপত দেখা পোৱা যাব ভাৰতীয় দলৰ বিশ্বকাপ বিজয়ী প্ৰাক্তন অধিনায়ক মহেন্দ্ৰ সিং ধোনীক।

প্ৰাক্তন অধিনায়ক মহেন্দ্ৰ সিং ধোনীক অতি শীঘ্ৰে এখন টিভি ধাৰাবাহিকত দেখা পোৱা যাব।

টিভি ধাৰাবাহিকখনত ধোনীয়ে ভাৰতীয় সেনা বাহিনীৰ পুৰস্কৃত সেনা বিষয়া সকলৰ কাহিনী শুনাব।

মহেন্দ্ৰ সিং ধোনী ভাৰতীয় সেনাবাহিনীৰ পেৰাছুট ৰেজিমেণ্টৰ এগৰাকী লেফটেনেণ্ট কৰ্ণেল।

টিভি ধাৰাবাহিকখনৰ বিষয়ে এটা সূত্ৰই মত প্ৰকাশ কৰি কয়, ‘‘ধোনীয়ে টিভি ধাৰাবাহিকখনত পৰমবীৰ চক্ৰ আৰু অশোক চক্ৰ পুৰস্কাৰ বিজয়ী সেনা বিষয়াসকলৰ কাহিনী দৰ্শকক শুনাব।’’

জানিব পৰা মতে, ধোনীয়ে টিভি ধাৰাবাহিকৰ মাধ্যমেৰে দেশ মাতৃৰ হকে সেৱা আগবঢ়াই অহা সেনা জোৱান সকলৰ কাহিনী দেশৰ জনসাধাৰণক দেখুৱাব বিচাৰে।

সম্প্ৰতি ধাৰাবাহিকখনৰ স্ক্ৰীপ্ট প্ৰস্তুত হৈ উঠিছে আৰু কিছুদিন পাছতে ইয়াৰ শ্বুটিং আৰম্ভ হ’ব বুলি জানিব পৰা গৈছে।

উল্লেখযোগ্য যে, বিশ্বকাপৰ ছেমিফাইনেলত নিউজিলেণ্ডৰ বিৰুদ্ধে ভাৰতৰ পৰাজয়ৰ পাছতে ভাৰতীয় ক্ৰিকেট দলৰ পৰা আতৰি আছে মহেন্দ্ৰ সিং ধোনী।

ধোনীয়ে পুনৰ দললৈ কেতিয়া উভতি অহিব সেই সম্বন্ধে বিভিন্ন জল্পনা-কল্পনা চলি আছে।