কেৰালা, পঞ্জাবৰ পিছত এইবাৰ পশ্চিমবংগ; উত্তৰ-পূবৰ চৰকাৰ সমূহলৈও ‘কা’ বিৰোধী প্ৰস্তাৱ গ্ৰহণৰ আহ্বান মমতাৰ

কেৰালা আৰু পঞ্জাবৰ পিছত এইবাৰ বিধানসভাত ‘কা’ৰ বিৰুদ্ধে প্ৰস্তাৱ ল’বলৈ সাজু হৈছে পশ্চিমবংগ চৰকাৰ।

সোমবাৰে মুখ্য মন্ত্ৰী মমতা বেনাৰ্জিয়ে তেওঁলোকৰ চৰকাৰে শীঘ্ৰে ৰাজ্যখনৰ বিধানসভাত ‘কা’ৰ বিৰুদ্ধে প্ৰস্তাৱ গ্ৰহণ কৰা হ’ব বুলি উল্লেখ কৰি বিজেপি শাসিত অসম আৰু ত্ৰিপুৰাকে ধৰি উত্তৰ-পূবৰ সকলো ৰাজ্যকে একে প্ৰস্তাৱ ল’বলৈ আহ্বান জনায়।

‘আমি শীঘ্ৰে কাৰ বিৰুদ্ধে এক প্ৰস্তাৱ পাছ কৰিম’ বুলি উল্লেখ কৰি তেওঁ লগতে কয়, ‘মই উত্তৰ-পূবৰ আটাইকেখন ৰাজ্য আৰু বিৰোধী শাসিত ৰাজ্যকেইখনক আইনখনৰ বিৰুদ্ধে প্ৰস্তাৱ ল’বলৈ অনুৰোধ জনাম। NPR সম্পৰ্কতো কিবা সিদ্ধান্ত লোৱাৰ পূৰ্বে  তেওঁলোকে ইয়াৰ নিয়মসমূহ পঢ়ি ল’ব লাগে।‘

উল্লেখযোগ্য যে যোৱা সময়ছোৱাত এয়ে প্ৰথমবাৰৰ কাৰণে মমতা বেনাৰ্জিয়ে উত্তৰ-পূবৰ ৰাজ্যসমূহৰ নিৰ্বাচিত চৰকাৰৰ প্ৰতি জনোৱা আহ্বান।

বিজেপি শাসিত অসম, ত্ৰিপুৰাকে ধৰি উত্তৰ-পূবৰ আন চৰকাৰকেইখনে মমতাৰ আহ্বানৰ প্ৰতি সহাঁৰি জনোৱাৰ সম্ভাৱনা ক্ষীণ, অৱশ্যে তেওঁৰ এই আহ্বান চৰকাৰসমূহতকৈ ৰাজ্যকেইখনৰ প্ৰতিবাদী জনতাৰ প্ৰতিহে বুলি একাংশই মন্তব্য কৰিছে।

ইপিনে কাইলৈ অৰ্থাৎ ২২ জানুৱাৰীত উচ্চতম ন্যায়ালয়ে নাগৰিকত্ব (সংশোধন) আইনৰ  বৈধতাক প্ৰশ্ন তুলি সৰ্বোচ্চ ন্যায়ালয়খনত দাখিল কৰা আবেদনসমূহৰ শুনানি গ্ৰহণ কৰিব।