জামিন পালে শংকৰে: বিমানত মহিলাৰ ওপৰত প্ৰস্ৰাৱ কৰা শংকৰ মিশ্ৰক জামিন দিল্লী আদালতৰ

মুকলি আকাশৰ তললৈ অহাৰ পথ সুগম হৈছে বিতৰ্কিত শংকৰ মিশ্ৰৰ। আজি দিল্লীৰ আদালতে যোৱা বৰ্ষৰ ২৬ নৱেম্বৰত নিউয়ৰ্কৰ পৰা নতুন দিল্লী অভিমুখী এয়াৰ ইণ্ডিয়াৰ এখন বিমানত এগৰাকী মহিলা সহযাত্ৰীৰ ওপৰত প্ৰস্ৰাৱ কৰি তীব্ৰ চাঞ্চল্যৰ সৃষ্টি কৰা মিশ্ৰৰ জামিন মঞ্জুৰ কৰে।

দিল্লী আৰক্ষীয়ে আদালতত মিশ্ৰৰ জামিন আৱেদনৰ বিৰোধিতা কৰি যুক্তি প্ৰদৰ্শন কৰিছিল যদিও আদালতে মঞ্জুৰ কৰে মিশ্ৰৰ জামিন। দিল্লী আৰক্ষীয়ে মিশ্ৰৰ এনে লজ্জাজনক কাণ্ডৰ বাবে ভাৰত আন্তঃৰাষ্ট্ৰীয় পৰ্যায়ত বদনামৰ বলি হোৱা বুলি যুক্তি দৰ্শায়।

কিন্তু গোচৰৰ শুনানি গ্ৰহণ কৰা ন্যায়াধীশগৰাকীয়ে এই ঘটনাক ঘৃণনীয় বুলি স্বীকাৰ কৰিলেও আইনী দিশেৰে বিষয়টোৰ বিবেচনা কৰি আৰক্ষীৰ আবেদন অস্বীকাৰ কৰে আৰু শংকৰ মিশ্ৰক জামিন প্ৰদান কৰে।

উল্লেখ্য যে ১১ জানুৱাৰীত এখন দণ্ডাধীশ আদালতে মিশ্ৰৰ জামিন আবেদন অগ্ৰাহ্য কৰি মিশ্ৰৰ দ্বাৰা হোৱা কাৰ্যক অত্যন্ত ঘৃণনীয় বুলি অভিহিত কৰিছিল।

লক্ষণীয়ভাৱে এই ঘটনাৰ পাছতে অসামৰিক বিমান পৰিবহণ সঞ্চালকালয়ে বিমান সংস্থা এয়াৰ ইণ্ডিয়াক ৩০ লাখ টকা জৰিমনা বিহিছিল। লগতে বিমানখনৰ ভাৰপ্ৰাপ্ত পাইলটৰ অনুজ্ঞাপত্ৰ তিনি মাহৰ বাবে নিলম্বিত কৰিছিল।

অসামৰিক বিমান পৰিবহণ সঞ্চালকালয়ে তদুপৰি নিজৰ কৰ্তব্য পালনত গাফিলতিৰ অভিযোগত এয়াৰ ইণ্ডিয়াৰ বিমান সেৱাৰ সঞ্চালককো ৩ লাখ টকাৰ জৰিমনা বিহিছিল।

আনহাতে এয়াৰ ইণ্ডিয়াই শংকৰ মিশ্ৰৰ ওপৰত জাৰি কৰা ৩০ দিনৰ নিষেধাজ্ঞাৰ উপৰিও চলিত মাহৰ আৰম্ভণিতে চাৰি মাহৰ বাবে বিমান চলাচল নিষেধাজ্ঞা আৰোপ কৰিছিল।