বিশ্ববিদ্যালয় চৌহদত আততায়ীৰ গুলীবৰ্ষণ,৮ জন নিহত
ৰাছিয়াৰ পাৰ্ম চহৰৰ এখন বিশ্ববিদ্যালয়ৰ চৌহদত আজি এক ভয়ানক পৰিস্থিতিৰ সৃষ্টি হয়।
এজন বন্দুকধাৰী আততায়ীয়ে বিশ্ববিদ্যালয় চৌহদত প্ৰৱেশ কৰি অবাধ গুলীবৰ্ষণ কৰাৰ ফলত ৮ জন ব্যক্তিৰ মৃত্যু হোৱাৰ লগতে বহুকেইজন লোক আহত হয়।
ৰাছিয়াৰ গৃহ মন্ত্ৰালয়ে জনোৱা মতে, বন্দুকধাৰী আততায়ীজনক আটক কৰা হৈছে আৰু তেওঁক বৰ্তমান আৰক্ষী আৱেষ্টনীত ৰখা হৈছে।
গুলীবৰ্ষণৰ পৰা ৰক্ষা পাবলৈ বহু শিক্ষাৰ্থীয়ে বিশ্ববিদ্যালয়ৰ শ্ৰেণীকোঠাত নিজকে আৱদ্ধ কৰি লয়।
আনহাতে বহু শিক্ষাৰ্থীয়ে হঠাতে সংঘটিত এই ঘটনাত তৰ্কিব নোৱাৰি প্ৰাণ ৰক্ষাৰ বাবে এটি অট্টালিকাৰ খিৰিকীৰে বাহিৰলৈ জাঁপ দিয়ে বুলি জানিব পৰা গৈছে।
ঘটনাটোত আহত ব্যক্তিৰ সংখ্যা সঠিকভাৱে বৰ্তমানলৈকে জানিব পৰা হোৱা নাই যদিও ১০ ৰ পৰা ১৮ জনৰ ভিতৰত হ’ব বুলি অনুমান কৰা হৈছে। অৱশ্যে এই আঘাত গুলীবৰ্ষণৰ ফলত হৈছে নে অট্টালিকাৰ পৰা জপিওৱাৰ ফলত হৈছে সেই কথা স্পষ্ট নহয়।
আক্ৰমণ সংঘটিত কৰা আততায়ীজনৰ পৰিচয় এই পৰ্যন্ত উদ্ধাৰ হোৱা নাই যদিও তদন্ত অব্যাহত আছে বুলি জানিব দিয়ে গৃহ মন্ত্ৰালয়ে।