ধৰ্ষণৰ গোচৰত জামিনত জে’লৰ পৰা ওলাই আহি নিৰ্যাতিতাক প্ৰকাশ্যে গুলীচালনা

ধৰ্ষণৰ গোচৰত জামিনত মুকলি কৰি দিয়াৰ পাছত অভিযুক্তই গুলীয়াই হত্যা কৰাৰ চেষ্টা চলায়। এই চাঞ্চল্যকৰ ঘটনা সংঘটিত হৈছে দিল্লীৰ বসন্ত বিহাৰ অঞ্চলত। শনিবাৰে আৰক্ষীয়ে এই তথ্য ৰাজহুৱা কৰে। জানিব পৰা মতে, এই ঘটনাত মূল অভিযুক্ত ছ’ফী আৰু তেওঁৰ সহযোগী অমন শুক্লাক গ্ৰেপ্তাৰ কৰা হৈছে।

আৰক্ষীৰ সূত্ৰ অনুসৰি মহিলাগৰাকীয়ে যোৱা বছৰ ছ’ফীৰ বিৰুদ্ধে ধৰ্ষণৰ এজাহাৰ দাখিল কৰিছিল। শেহতীয়াকৈ সেই গোচৰত অভিযুক্তৰ জামিন লাভ কৰা হৈছিল। জামিনত মুকলি কৰি দিয়াৰ পাছতে অভিযুক্তই হত্যাৰ ষড়যন্ত্ৰ কৰে। সেই অনুসৰি যোৱা ৩০ জুলাইত মহিলাগৰাকীয়ে অটোৰিক্সাত গৈ থকা অৱস্থাত অভিযুক্তই ক’লা মটৰ চাইকেলেৰে তেওঁক খেদি পঠিয়াইছিল। সুযোগ গ্ৰহণ কৰি মহিলাগৰাকীক উদ্দেশ্যি ওচৰৰ পৰা গুলীয়াচালনা কৰা হয়। তথ্য লাভ কৰাৰ লগে লগে আৰক্ষীয়ে ক্ষীপ্ৰতাৰে সেই স্থানত উপস্থিত হয়। তেওঁলোকৰ উদ্যোগত পিচিআৰ ভ্যানত মহিলাগৰাকীক চিকিৎসালয়লৈ লৈ যোৱা হয়।

ইফালে ঘটনাৰ তদন্ত কৰি চিচিটিভিৰ ফুটেজ পৰীক্ষা কৰি যোৱা ৩১ জুলাইত অমন শুক্লাক গ্ৰেপ্তাৰ কৰে।তেওঁৰ মটৰ চাইকেলখনো জব্দ কৰে। পিছদিনা ১ আগষ্টত মূল অভিযুক্ত আবুজাইৰ শ্বাফীক গ্ৰেপ্তাৰ কৰা হয়। তেওঁৰ পৰা উদ্ধাৰ হৈছে এটা আগ্নেয়াস্ত্ৰ। ভুক্তভোগীৰ বক্তব্যৰ ভিত্তিত দিল্লীৰ বসন্ত বিহাৰ থানাত ভাৰতীয় দণ্ডবিধিৰ কেইবাটাও ধাৰাত গোচৰ ৰুজু কৰা হৈছে।

আৰক্ষীৰ মতে, জেৰাৰ সময়ত অভিযুক্ত শ্বাফীয়ে স্বীকাৰ কৰে যে মহিলাগৰাকীয়ে তেওঁৰ বিৰুদ্ধে ধৰ্ষণৰ গোচৰ ৰুজু কৰাত তেওঁ ক্ষুব্ধ হৈ পৰিছে। তেওঁ কেইবাবাৰো মহিলাগৰাকীৰ সৈতে যোগাযোগ কৰিবলৈ চেষ্টা কৰিছিল যদিও তেওঁক এৰাই চলিছিল। যাৰ বাবে তেওঁ মহিলাগৰাকীক হত্যা কৰাৰ পৰিকল্পনা ৰচনা কৰে। ইফালে দিল্লীৰ ৰাজপথত দিনৰ পোহৰত হত্যাৰ এনে প্ৰচেষ্টাই ৰাজধানীৰ নিৰাপত্তাক লৈ প্ৰশ্ন জনসাধাৰণৰ মাজত উত্থাপন কৰিছে।