Transplant of pig heart into human body চিকিৎসা বিজ্ঞানৰ চমৎকাৰ! মানৱ দেহত গাহৰিৰ কলিজা সফলতাৰে প্ৰতিষ্ঠাপন; গঢ়িলে ইতিহাস

Transplant of pig heart into human body চিকিৎসা বিজ্ঞানৰ জগতত প্ৰথমবাৰৰ বাবে ইতিহাস সৃষ্টি কৰি মানৱ দেহত সফলতাৰে প্ৰতিষ্ঠাপন কৰা হ’ল গাহৰিৰ কলিজা। বিশেষজ্ঞসকলে এই সফলতাৰ পাছত বিশ্বত অংগ দানক লৈ হোৱা সমস্যাৰ অৱসান ঘটিব বুলি আশা কৰিছে।

সোমবাৰে বাল্টিমোৰৰ ইউনিভাৰ্ছিটি অফ মেৰিলেণ্ড মেডিকেল স্কুলৰ ফালৰ পৰা প্ৰকাশ কৰা এক বিবৃতিত কোৱা হৈছে যে যোৱা শুকুৰবাৰে ৫৭ বছৰীয়া এগৰাকী ব্যক্তিৰ দেহত গাহৰিৰ হৃৎপিণ্ড প্ৰতিষ্ঠাপন কৰা হৈছে।

প্ৰতিষ্ঠাপনৰ পূৰ্বে গাহৰিৰ হৃৎপিণ্ডটো জিনগতভাৱে পৰিৱৰ্তন কৰা হৈছিল।

বৰ্তমান ৰোগীগৰাকী সুস্থ হৈ উঠিছে আৰু চিকিৎসকসকলে তেওঁৰ নতুন অংগই কিধৰণে কাম কৰিছে তাৰ প্ৰতি তীক্ষ্ণ দৃষ্টি ৰাখিছে।

মানৱ শৰীৰৰ জন্তুৰ অংগ সংৰোপনৰ দিশত এই ঘটনা এক মাইলৰ খুটি হ’বলৈ আগবাঢ়িছে বুলি চিকিৎসকলে দাবী কৰিছে।

অস্ত্ৰোপচাৰ কৰা চিকিৎসক বাৰ্টলে গ্ৰিফিথে কয় যে এয়া এক যুগান্তকাৰী অস্ত্ৰোপচাৰ আছিল। অংগৰ অভাৱ দূৰ কৰাৰ ক্ষেত্ৰত আমি আৰু এখোপ আগবাঢ়িলো।

তেওঁ লগতে কয় যে আমি সাৱধানতাৰে খোজ দিছো। কিন্তু আমি আশাবাদী যে বিশ্বত এনে প্ৰথম অস্ত্ৰোপচাৰৰ ফলত আগন্তুক দিনত ৰোগীসকলৰ বাবে এক নতুন সম্ভাৱনা জগাই তুলিব।

ইউনিভাৰ্ছিটি অফ মেৰিলেণ্ড মেডিকেল স্কুলৰ ফালৰ পৰা জানিবলৈ দিয়া হৈছে যে ডেভিড বেনেট নামৰ ৰোগীগৰাকী যোৱা কেইমাহ ধৰি শয্যাশায়ী হৈ পৰিছিল। এটা যন্ত্ৰৰ সহায়ত তেওঁৰ হৃৎপিণ্ড চলি আছিল। তেওঁৰ শৰীৰে মানৱ দেহৰ হৃৎপিণ্ডৰ ঢপঢপনি সহিব নোৱাৰিলেহেঁতেন। সাধাৰণ অংগগ্ৰহণকাৰী দেহৰ অৱস্থাৰ অৱনতি ঘটিলে এনে পৰিস্থিতিৰ সৃষ্টি হয়।

অংগ প্ৰতিষ্ঠাপনৰ পূৰ্বে ৰোগী ডেভিড বেনেটে কৈছিল,’’কথাটো এনেকুৱা যে হয় মৃত্যুক আকোঁৱালি ল’ব লাগিব নহ’লে এই অংগ প্ৰতিষ্ঠাপন কৰিব লাগিব। মই জীয়াই থাকিব বিচাৰো। মই এয়া জীৱন-মৃত্যুৰ শেষ ৰণ বুলি জানিছিলো, কিন্তু এই প্ৰতিষ্ঠাপন আছিল মোৰ বাবে অন্তিম বিকল্প।‘

ৰোগী ডেনেটে এতিয়া সুস্থ হৈ বিছনাৰ পৰা উঠি বহিবলৈ আশাৰে অপেক্ষা কৰিছে।

উল্লেখ্য যে বহু কেইবছৰ পূৰ্বে অসমৰ এগৰাকী বিশিষ্ট চিকিৎসক ডাঃ ধনীৰাম বৰুৱাই মানৱ দেহত গাহৰিৰ কলিজা প্ৰতিষ্ঠাপনৰ প্ৰচেষ্টা চলাই বিতৰ্কৰ সন্মুখীন হৈছিল যদিও এতিয়া তেওঁৰ সেই প্ৰচেষ্টাকে সফলতাৰে ৰূপায়ন কৰি ইতিহাস গঢ়িলে আমেৰিকাৰ চিকিৎসা বিজ্ঞানীয়ে।