৩ বছৰৰ বাবে অভিনয়ৰ পৰা নিষিদ্ধ কৰা হ’ল মণিপুৰী অভিনেত্ৰী তথা গায়িকা সোমা লাইশ্ৰামক

মণিপুৰৰ জনপ্ৰিয় চলচ্চিত্ৰ অভিনেত্ৰী তথা গায়িকা সোমা লাইশ্ৰামক তিনি বছৰৰ বাবে ছবিত অভিনয় আৰু সামাজিক অনুষ্ঠানত যোগদানত নিষেধাজ্ঞা আৰোপ কৰিছে মণিপুৰৰ এক শক্তিশালী সামাজিক সংগঠন কংগলেইপাক কানবা লুপ (কে কে এল)য়ে।

যোৱা ১৬ ছেপ্টেম্বৰত নতুন দিল্লীৰ টলকটোৰা ষ্টেডিয়ামত মাই হোম ইণ্ডিয়াই আয়োজন কৰা উত্তৰ-পূব উৎসৱত “শ্ব’ ষ্টপাৰ” সৌন্দৰ্য্য প্ৰতিযোগিতাত লাইশ্ৰামে অংশগ্ৰহণ কৰাৰ বাবে এই নিষেধাজ্ঞা জাৰি কৰা হৈছে।

সোমবাৰে প্ৰকাশ কৰা এক বিবৃতিত কেকেএলে কয় যে লাইশ্ৰামৰ এই উৎসৱত অংশগ্ৰহণ কৰাটো মাৰাত্মক অপৰাধ (cardinal crime) যিয়ে “মণিপুৰক স্বাভাৱিক ৰাজ্য হিচাপে প্ৰদৰ্শন কৰাৰ ক্ষেত্ৰত অৰিহনা যোগাইছে।”

বিবৃতিটোত লগতে কোৱা হৈছে যে কেকেএলে সকলো মেইটেই জনগোষ্ঠীক আহ্বান জনোৱাৰ পিছতো আৰু মণিপুৰ এতিয়াও জ্বলি থকাৰ সময়ত তথা আমাৰ মেইটেইসকলৰ মৃতদেহ আজি চাৰি মাহ ধৰি পৰি পচি থকা অৱস্থাত লাইশ্ৰামক ব্যক্তিগতভাৱে উদযাপনত অংশগ্ৰহণৰ পৰা বিৰত থাকিবলৈ পৰামৰ্শ দিয়াৰ পিছতো এনে অনুষ্ঠানত যোগদান কৰাৰ বাবে এই নিষেধাজ্ঞা জাৰি কৰা হৈছে।

এই নিৰ্দেশনাক অৱজ্ঞা কৰি যদি কোনো ব্যক্তি বা গোটে লাইশ্ৰমক নিজৰ অনুষ্ঠানত জড়িত কৰে তেন্তে তেওঁলোকে নিজৰ কাৰ্য্যৰ পৰিণতি ভূগিব লাগিব বুলিও সকীয়াই দিছে সংগঠনটোৱে।

ইয়াৰ উপৰিও সকলো চি এছ অ’ আৰু সামাজিক সংগঠন মেইটিয়া পাইবীক এই পদক্ষেপৰ সৈতে থিয় দিবলৈ আহ্বান জনায়।