ভয়ংকৰ ঘটনা: চোৰাংচোৱাৰ সন্দেহত ২৫জন আদিবাসী লোকক নৃশংসভাৱে হত্যা মাওবাদীৰ

একেলগে ২৫জন আদিবাসী লোকক নৃশংসভাৱে হত্যা কৰা হৈছে। ছত্তীশগড়ৰ বিজাপুৰত আৰক্ষীৰ চোৰাংচোৱাগিৰিৰ সন্দেহত এইদৰে মাওবাদীয়ে ২৫জন লোকক হত্যা কৰিছে।

এই নৃশংস হত্যাকাণ্ডৰ ঘটনাৰ কথা তেওঁলোকে স্বীকাৰো কৰিছে। ইপিনে, এই ঘটনাৰ কথা পোহৰলৈ অহাৰ পাছতে ৰাজ্যজুৰি জোকাৰণিৰ সৃষ্টি হৈছে।

বাতৰি অনুসৰি, বিজাপুৰ জিলাত সংঘটিত হৈছে এই হত্যাকাণ্ডৰ ঘটনা। আৰক্ষীয়ে মাওবাদীৰ গোপন কাৰ্যকলাপৰ বিষয়ে জানিব পৰাৰ কথা গম পোৱাৰ পাছত গাঁৱৰ আদিবাসীসকলে আৰক্ষীৰ চোৰাংচোৱা হিচাপে কাম কৰা তথা খৱৰ যোগান ধৰাৰ সন্দেহত তেওঁলোকক হত্যা কৰা হয়।

এনেদৰে হত্যা কৰাৰ পাছত নিজেই প্ৰেছ বিবৃতি দি  মাওবাদীসকলে এই ঘটনাৰ কথা স্বীকাৰ কৰিছে।

দণ্ডকাৰণ্য বিশেষ মণ্ডল কমিটিৰ পৰা মাওবাদী নেতা বিকল্পই জাৰি কৰা প্ৰেছ বিবৃতিত কোৱা হৈছে যে এই আদিবাসীসকলে আৰক্ষীক মাওবাদীৰ খৱৰ যোগান ধৰাৰ ‘অপৰাধ’ কৰিছিল।

তেওঁলোকে ২৫জন লোকক বিশ্বাসঘাতক বুলি অভিহিত কৰি জানিবলৈ দিয়ে যে এই ২৫জনৰ ভিতৰত ১২জন আছিল গোপন এজেন্ট, ৮জন আৰক্ষীৰ চোৰাংচোৱা আৰু বাকী ৫জনে মুলসুঁতিলৈ ঘুৰি অহাৰ চেষ্টা কৰিছিল। সেয়েহে, তেওঁলোকক গণ-আদালত বহাই শাস্তি দিয়া হয়।

মাওবাদীসকলে অৱশ্যে কেতিয়া এই ঘটনা সংঘটিত কৰিছে সেইকথা বিবৃতিত উল্লেখ কৰা নাই।

সূত্ৰসমূহৰ মতে, ছেপ্টেম্বৰৰ শেষৰ পিনে কোনো এটা দিনত এই অপাৰেশ্যন চলোৱা হৈছিল।

তেলেংগানাৰ ভদ্ৰদী কোথাগুদম জিলাৰ আৰক্ষী প্ৰশাসনে জানিবলৈ দিয়া মতে চোৰাংচোৱাৰ তথ্য অনুসৰি মাওবাদীসকলে বাট্টাগুদা, কানৱয়াৰগাট্টা, পুছুবাকা, গংগালুৰকে ধৰি বিভিন্ন গাঁৱত অপাৰেশ্যন চলাই ১৬জন গাঁৱবাসীক হত্যা কৰিছে।

মাওবাদীৰ মুখপাত্ৰ বিকল্পই এই আদিবাসীসকলে ভিজ্জা আৰক্ষীৰ এজেন্ট হিচাপে কাম কৰাৰ অভিযোগ তুলি তেওঁলোকৰ কামে মাওবাদীৰ বহু ক্ষতি কৰিছে বুলি জনায়। দলৰ সভাৰ বহু গোপন তথ্য চাৰিবাৰকৈ ভিজ্জা আৰক্ষীক দিয়াৰো অভিযোগ কৰে।

বস্তাৰৰ আইজিপি সুন্দৰ, বিজাপুৰৰ আৰক্ষী অধীক্ষক কমলা লোকান কাশ্যপ আৰু আন আৰক্ষী বিষয়াই মিলি ২০২২ৰ ভিতৰত মাওবাদীসকলক নিৰ্মূল কৰাৰ পৰিকল্পনা কৰিছিল বুলি মাওবাদী নেতা বিকল্পই অভিযোগ কৰে।

মাওবাদীসকলে অভিযোগ কৰে যে এই ‘বিশ্বাসঘাতক’সকলৰ বাবে আৰক্ষীয়ে বেংক একাউন্ট খুলি দিছিল। আদিবাসীসকলৰ ওপৰত অত্যাচাৰ চলাই সেয়া মাওবাদীৰ ওপৰত জাপি দিয়াৰ অভিযোগত তুলি তাৰ বাবেই তেওঁলোকক শাস্তি দিয়া হৈছে বুলি সদৰী কৰিছে।