চামগুৰিত ব্যাপক গৰাখহনীয়া, ব্ৰহ্মপুত্ৰত জাহ গ’ল পুৰণি মছজিদ, মাদ্ৰাছা

ৰাজ্যৰ নৈপৰীয়া বিভিন্ন স্থানত বান পৰিস্থিতি কিছু শাম কাটিছে যদিও ঠায়ে-ঠায়ে আৰম্ভ হোৱা ব্যাপক গৰাখহনীয়াৰ ফলত ভেটি-মাটি হেৰুৱাই সৰ্বস্বান্ত হৈছে বহুসংখ্যক পৰিয়াল।

বানপানী কমাৰ পিছতে ভয়ংকৰভাৱে আৰম্ভ হোৱা ব্ৰহ্মপুত্ৰৰ প্ৰৱল গৰাখহনীয়াৰ বাবে দেওবাৰে নিশা চামগুৰি-কলিয়াবৰ সীমান্তৱৰ্ত্তী ৪নং ভূৰবন্ধাত সৰ্বত্ৰে সৃষ্টি হ’ল এক শোকাকুল পৰিৱেশ।

প্ৰৱল গৰাখহনীয়াত নিশা প্ৰায় ৯-৩০ মান বজাত ব্ৰহ্মপুত্ৰৰ বুকুত বিলীন হৈ গ’ল ৪নং ভূৰবন্ধাস্থিত এটা অতি পুৰণি মছজিদ লাল মছজিদ।

মছজিদসহ গৰাখহনীয়াই এখন মাদ্ৰাছাও নিঃশ্চিহ্ন কৰি পেলোৱাক কেন্দ্ৰ কৰি নিশা কান্দোনত ভাগি পৰিল স্থানীয় একাংশ লোক।

দ্ৰুতগতিত হোৱা গৰাখহনীয়াৰ বাবে ৪নং ভূৰবন্ধাৰ বহুকেইটা পৰিয়ালে নিশাৰ ভিতৰতে ঘৰৰ যাৱতীয় সা-সামগ্ৰীসমূহ গাড়ীত বোজাই কৰি লৈ নিৰাপদ স্থানলৈ আঁতৰি যোৱা পৰিলক্ষিত হয়।

ইফালে চামগুৰিৰ লাওখোৱাৰ বৃহত্তৰ ভূৰবন্ধা অঞ্চলত প্ৰতি বছৰে ক্ৰমশঃ বৃদ্ধি পাই অহা ব্ৰহ্মপুত্ৰৰ বিধ্বংসী বান আৰু প্ৰবল গৰাখহনীয়াৰ বিষয়টো বহুবাৰ জলসম্পদ বিভাগক গুৰুত্ব সহকাৰে অৱগত কৰি অহাৰ পিছতো সময়সাপেক্ষে স্থায়ী সমাধানৰ বাবে বিহিত ব্যৱস্থা গ্ৰহণ নকৰাৰ অভিযোগ উত্থাপন কৰি সংশ্লিষ্ট বিভাগটোৰ লগতে মন্ত্ৰী কেশৱ মহন্তৰ বিৰুদ্ধে ক্ষোভ প্ৰকাশ কৰা দেখা গ’ল ভুক্তভোগী ৰাইজে।

আৱশ্যে এদিন পূৰ্বে দিনৰ ভাগত জল সম্পদ বিভাগৰ তৰফৰ পৰা এখন মেচিন নাৱেৰে গৰাখহনীয়া আক্ৰান্ত ৪নং ভূৰবন্ধাৰ নৈৰ পাৰত তাৎক্ষণিকভাৱে একাধিক পকী পাৰ্কুপাইন পেলাই শেহতীয়াকৈ গৰাখহনীয়া ৰোধৰ ব্যৱস্থা কৰা হৈছিল বুলি স্থানীয় একাংশ লোকৰ পৰা জানিব পৰা গৈছে।