অসম সাহিত্য সভাৰ স্মৃতিগ্ৰন্থত বাৰেপাচি ভুল; “ভাষাৰ শ্ৰাদ্ধ’ পতা বুলি ধিক্কাৰ বিভিন্নজনৰ

অসম সাহিত্য সভাৰ দৰে জাতীয় অনুষ্ঠান এটাৰ দায়িত্ব আৰু কৰ্তব্য নিষ্ঠাৰ ওপৰত আকৌ এক গভীৰ প্ৰশ্ন চিহ্নৰ অৱতাৰণা হৈছে।

অৱশ্যে, এয়া সভাৰ কাণ্ডাৰীসকলৰ জাতীয় অনুষ্ঠানটোক জনসমাজত হাঁহিয়াতৰ পাত্ৰ কৰি তোলাৰ এক প্ৰয়াস বুলিও ক’ব পাৰি।

বৰ্তমান শুৱালকুছিত চলি থকা অসম সাহিত্য সভাৰ ৭৫ সংখ্যক অধিৱেশন উপলক্ষে প্ৰকাশ পোৱা স্মৃতিগ্ৰন্থ শুৱালকুছি-জ্যোতিয়ে সাহিত্যানুৰাগীকে ধৰি বিভিন্ন জনৰ দৃষ্টি কাঢ়িছে ইয়াৰ বিয়াগোম ভুলৰ বাবে।

সাহিত্য সভাৰ স্মৃতিগ্ৰন্থ এখনৰ এটা পৃষ্ঠাত কিমান ভুল থাকিব পাৰে তাক লৈ প্ৰশ্ন কৰি বহুজনে কটাক্ষও কৰিছে।

কোৱা হৈছে সাহিত্য সভাৰ সভাপতিগৰাকীৰ নামটোৱেই নতুন ৰূপত দেখা গ’ল।

তদুপৰি, ৰাজ্যখনৰ মুখ্য মন্ত্ৰীগৰাকীৰ নাম আৰু উপাধি দুয়োটাই ভুলকৈ প্ৰকাশ পালে।

ভাষা-সাহিত্যৰ চৰ্চা নে শ্ৰাদ্ধ এই বুলি প্ৰশ্ন তুলি সভাৰ স্মৃতিগ্ৰন্থ এনেদৰে বাৰেপাচি ভুলেৰে প্ৰকাশ পোৱাত ক্ষোভ ব্যক্ত কৰা হৈছে।

ছচিয়েল মিডিয়াত এগৰাকী সাহিত্যানৰাগীৰ প্ৰশ্ন, “এইয়াই নেকি অসম সাহিত্য সভাৰ ভাষা, জাতি তথা সাহিত্যৰ প্ৰতি দায়বদ্ধতা !!’’

লগতে লিখিছে, প্ৰিন্টিং মিছটেক বুলি বিতৰ্ক নকৰিব কাৰণ এইয়া সাধাৰণ আলোচনী নহয় অসম সাহিত্য সভাৰ অধিবেশনৰ বাবে প্ৰকাশিত মুখপত্ৰ । যাৰ বাবে যথেষ্ট সাৱধানতা আৰু নিষ্ঠাৰ প্ৰয়োজন আছিল।

কোৱা হৈছে, “কিয়নো কিছুমান ভুলৰ পক্ষত কোনো যুক্তিয়ে গ্ৰহণযোগ্য হব নোৱাৰে।’

অসম সাহিত্য সভাৰ দরেৰে জাতীয় অনুষ্ঠানৰ অসমৰ জাতীয় জীৱনত ভূমিকাক লৈ বিভিন্ন সময়ত বিভিন্ন জনে অভিযোগ উত্থাপন কৰি অহাৰ সময়তে সভাৰ এনে কিছুমান কামকাজে সভাৰ মান যে অৱনিত কৰিলে সেয়া নিশ্চিত।