প্ৰণৱ দলে আৰু আদিত চন্দ্ৰ ৰাভাৰ মুক্তিৰ দাবীত ডিফুত উত্তাল প্ৰতিবাদ: বানপানীক ৰাষ্ট্ৰীয় দুৰ্যোগ ঘোষণাৰ দাবী

যোৱা ২৭ জুলাই তাৰিখে কাৰ্বি আংলং জিলাৰ সদৰ ডিফুত এক বিশাল প্ৰতিবাদী কাৰ্যসূচী ৰূপায়ণ কৰা হয়। আঞ্চলিক ৰাজনৈতিক দল এ পি এইচ এল চিৰ উদ্যোগত আয়োজন কৰা এই প্ৰতিবাদৰ মূল লক্ষ্য আছিল ভূমি অধিকাৰ আন্দোলনৰ নেতা প্ৰণৱ দলে, আদিত চন্দ্ৰ ৰাভা, বিজিত কুটুম, ভাস্কৰ শইকীয়া, ৰাজীৱ পেগু আৰু অমিত নাগৰ মুক্তিৰ দাবী কৰা। প্ৰায় তিনি শতাধিক প্ৰতিবাদকাৰীয়ে একগোট হৈ চৰকাৰৰ বিৰুদ্ধে বিভিন্ন শ্লোগানেৰে পৰিৱেশ উত্তাল কৰি তোলে। তেওঁলোকে জনজাতীয় লোকৰ মাটি পুঁজিপতিক দিয়া বন্ধ কৰিবলৈ আৰু কাৰ্বি আংলঙক স্ব-শাসিত ৰাজ্যৰ মৰ্যাদা দিবলৈ দাবী জনায়। এই ধৰ্ণা কাৰ্যসূচীৰ অন্তত প্ৰতিবাদকাৰীসকলে কাৰ্বি আংলং জিলা প্ৰশাসনৰ জৰিয়তে ভাৰতৰ ৰাষ্ট্ৰপতিলৈ এখন স্মাৰক পত্ৰও প্ৰেৰণ কৰে।

এই প্ৰতিবাদী সভাত উপস্থিত থাকি এ পি এইচ এল চিৰ সভাপতি জন ইংতি কাথাৰে চৰকাৰক তীব্ৰ সমালোচনা কৰে। তেওঁ কয় যে বৰ্তমানৰ বিজেপি চৰকাৰখন সম্পূৰ্ণৰূপে জনজাতীয় লোকৰ বিৰোধী। চৰকাৰে সাধাৰণ জনজাতীয় মানুহৰ মাটি-বাৰী পুঁজিপতি গোষ্ঠী যেনে আদানি, আম্বানি আৰু ৰামদেৱক গতাই দিব বিচাৰিছে বুলি তেওঁ অভিযোগ কৰে। ইয়াৰ বিৰুদ্ধে মাত মতাৰ বাবেই প্ৰণৱ দলে আৰু আদিত চন্দ্ৰ ৰাভাক চৰকাৰে গ্ৰেপ্তাৰ কৰিছে বুলি তেওঁ ক্ষোভ প্ৰকাশ কৰে। কাথাৰে ষষ্ঠ অনুসূচীৰ অন্তৰ্গত অঞ্চলসমূহ সম্পূৰ্ণ সুৰক্ষিত কৰিবলৈ ভাৰত চৰকাৰৰ ওচৰত দাবী জনায়। ইয়াৰ লগতে তেওঁ দিল্লীত আন্দোলন কৰি থকা ছাত্ৰ-ছাত্ৰী আৰু সোনম ৱাংচুককো তেওঁলোকৰ সংগ্ৰামৰ বাবে অভিনন্দন জনায়।

সভাত উপস্থিত থাকি ভূমি অধিকাৰ যৌথ সংগ্ৰাম সমিতিৰ আহ্বায়ক সুব্ৰত তালুকদাৰে অসমৰ বানপানী সমস্যাক লৈ গুৰুত্বপূৰ্ণ মত প্ৰকাশ কৰে। তেওঁ কয় যে তথাকথিত উন্নয়নৰ নামত অসমৰ খিলঞ্জীয়া আৰু খাটিখোৱা মানুহৰ জীৱনলৈ এক ভয়াবহ দুৰ্যোগ নামি আহিছে। এই উন্নয়নৰ নামতেই শিৱসাগৰৰ ৰাইজে শেহতীয়া বানপানীত নিজৰ সৰ্বস্ব হেৰুৱাব লগা হৈছে। সেয়েহে তেওঁ অসমৰ বানপানীক ৰাষ্ট্ৰীয় দুৰ্যোগ হিচাপে স্বীকৃতি দিবলৈ দাবী জনায়। লগতে গ্ৰেপ্তাৰ হোৱা ভূমি আন্দোলনৰ সকলো নেতাক অতি শীঘ্ৰে মুক্তি দিবলৈ তেওঁ চৰকাৰক আহ্বান জনায়। এই গুৰুত্বপূৰ্ণ প্ৰতিবাদী কাৰ্যসূচীত এ পি এইচ এল চিৰ নেতা বিক্ৰম হান্স, কুৰছিং টিমুং আৰু কাকু ৰংপিপীকে ধৰি বহুতো লোক উপস্থিত থাকে।