ভাইৰাছ প্ৰতিৰোধত তৎপৰ: মেক্সিকোত বন্ধ কৰা হ’ল কৰ’না বীয়েৰৰ উৎপাদন

বিশ্বৰ আন আন দেশৰ লগতে মেক্সিকোতো মহামাৰীৰ ৰূপ ধাৰণ কৰিছে কৰ’না ভাইৰাছে।  এই মাৰাত্মক ভাইৰাছৰ সৈতে মোকাবিলা কৰিবলৈ এতিয়া যথেষ্ট সংগ্ৰাম কৰিবলগীয়া হৈছে।

সেয়েহে, দেশৰ মানুহৰ স্বাস্থ্যৰ প্ৰতি লক্ষ্য ৰাখি বৃহস্পতিবাৰৰ পৰা বন্ধ কৰা হৈছে কৰ’না বীয়েৰৰ উৎপাদন। মেক্সিকো চৰকাৰে এই সিদ্ধান্ত গ্ৰহণ কৰিছে।

দেশখনে এই বীয়েৰৰ উৎপাদনৰ পৰা অহা টকা চিকিৎসা ক্ষেত্ৰত ব্যৱহাৰ কৰাৰ সিদ্ধান্ত লৈছে।

কৰ’নাৰ সংক্ৰমণে জনসাধাৰণৰ মাজত তীব্ৰ আতংকৰ সৃষ্টি কৰিছে। সমান্তৰালভাৱে আক্ৰান্ত তথা মৃতকৰ সংখ্যা বৃদ্ধি পাই আছে।

মেক্সিকোত আক্ৰান্তৰ সংখ্যা ১৫০০ অতিক্ৰম কৰাৰ লগতে ৫০জনতকৈয়ো অধিক লোকৰ মৃত্যু হৈছে।

দেশখনত হেলথ ইমাৰজেন্সী জাৰি কৰাৰ লগতে অত্যাৱশ্যকীয় সামগ্ৰীৰ বাহিৰে বাকী সকলো সামগ্ৰীৰ উৎপাদন বন্ধ কৰি দিয়া হৈছে।

মেক্সিকোত কৰ’না বীয়েৰ প্ৰস্তুত কৰে গ্ৰুপো মোডেলো নামৰ এটা কোম্পানীয়ে।  তেওঁলোকৰ পেছিফিকো আৰু মোডেলো নামে আৰু দুটা মদৰ ব্ৰেণ্ড আছে।

চৰকাৰৰ ফালৰ পৰা দিয়া নিৰ্দেশৰ পৰিপ্ৰেক্ষিততে কোম্পানীটোৱে এই সিদ্ধান্ত লোৱা বুলি জানিবলৈ দিছে।

কোম্পানীৰ ফালৰ পৰা কোৱা হৈছে,’’আমি আমাৰ ফেক্টৰীত উৎপাদন হ্ৰাস কৰিছো। কিছুদিনৰ ভিতৰতে সেয়া সম্পূৰ্ণ বন্ধ কৰি দিয়া হ’ব। তদুপৰি, চৰকাৰে বিচাৰিলে গ্ৰুপো মোডেলোৱে ইয়াৰ ৭৫ সতাংশ কৰ্মচাৰীক অন্য কামত নিয়োজিত কৰিব।‘’

মেক্সিকো চৰকাৰে জনাইছে যে কৃষিজাত সামগ্ৰীৰ বাহিৰে বাকী খণ্ডৰ উৎপাদন বৰ্তমান বন্ধ ৰখা হ’ব।

মেক্সিকোৰ অন্যতম বীয়েৰ উৎপাদন কৰা কোম্পানী ‘হেইনেকেন’য়ে ও ইয়াৰ ‘টিকেটছ’ আৰু ‘ডছ ইকুইছ’ৰ দৰে প্ৰসিদ্ধ বীয়েৰ উৎপাদন শুকুৰবাৰৰ পৰা বন্ধ কৰিব পাৰে।

উল্লেখযোগ্য যে কৰ’নাভাইৰাছৰ আতংক বিয়পি পৰাৰ পাছৰে পৰা কৰ’না বীয়েৰক লৈ বিভিন্ন প্ৰতিক্ৰিয়াৰ সৃষ্টি হৈছিল। বিভিন্ন দেশসমূহত ইয়াৰ বিক্ৰী হ্ৰাস পাইছিল।

খৱৰ অনুসৰি, কেবল আমেৰিকাতে ইয়াৰ বিক্ৰী প্ৰায় আধা হ্ৰাস পাইছিল। অৱশ্যে কোম্পানীৰ ফালৰ পৰা কোৱা হৈছে যে নামৰ বাহিৰে ভাইৰাছৰ লগত ইয়াৰ কোনো সম্পৰ্ক নাই।

কিন্তু কৰ’না বীয়েৰৰ পৰাও শংকা বিয়পিছে। গতিকেই কোম্পানীটোৱে বন্ধ কৰাৰ সিদ্ধান্ত লৈছে ইয়াৰ উৎপাদন।