গ্ৰাহকৰ অতিমাত্ৰা সঁহাৰিত ভাৰতত বন্ধই হৈ গ’ল যিখন গাড়ীৰ বুকিং

গ্ৰাহকৰ অভাৱনীয় সঁহাৰিৰ ফলত ভাৰতত মুকলি কৰিবলৈ লোৱা প্ৰথমখন গাড়ী হেক্তৰৰ বুকিঙেই বন্ধ কৰিব লগা হৈছে চীনা মালিকানাধীন বৃটিশ্ব কাৰ ব্ৰেণ্ড মৰিছ গেৰাজে।

যোৱা ৪ জুনত মুকলি কৰা হেক্তৰ বুকিংকাৰীৰ সংখ্যা মাত্ৰ ৬ সপ্তাহতে ২১,০০০ হাজাৰ চোৱাত সাময়িকভাৱে গাড়ীখনৰ বুকিং বন্ধ কৰা হৈছে।

মিড ছাইজদ এচ ইউ ভিখনৰ অভাৱনীয় চাহিদা পূৰাবলৈ কোম্পানিটোক সদ্যহতে প্ৰায় ১০ মাহ সময়ৰ প্ৰয়োজন হ’ব।

গুজৰাটত কাৰখানা পতা কোম্পানিটোৰ বৰ্তমান নিৰ্মাণ ক্ষমতা মাহত প্ৰায় ২০০০খন।

কোম্পানিটোৱে জনোৱা মতে, হেক্তৰৰ শীৰ্ষ দুই মদেল স্মাৰ্ট আৰু শ্বাৰ্পৰ বাবেই তেওঁলোকে সৰ্বাধিক বুকিং লাভ কৰিছে। পে’ত্ৰল সংস্কৰণৰ বুকিং হৈছে ৫০ শতাংশতকৈয়ো অধিক।

গুজৰাটৰ কাৰখানাটো বছৰি সৰ্বোচ্চ ৮৪০০০খন গাড়ী নিৰ্মাণৰ বাবে সক্ষম। অহা অক্তোবৰৰ ভিতৰত তেওঁলোকে ইয়াৰ বৰ্তমানৰ নিৰ্মাণ ক্ষমতা বঢ়োৱাৰ চিন্তা কৰিছে।

ভাৰতৰ কোম্পানিটোৱে ১২০টা ডীলাৰৰ জৰিয়তে গাড়ীসমূহ বিক্ৰী কৰিব।

গাড়ীখনৰ প্ৰতিযোগিতামূলক দাম নিৰ্ধাৰণৰ বাবেও ইয়াৰ চাহিদা অত্যধিক হোৱা বুলি ধাৰণা কৰা হৈছে। ভাৰতত মুকলি কৰিব লগা হেক্তৰৰ মূল্য হ’ব ১২.১৮ৰ পৰা ১৬.৮৮ লাখ টকা।

ভাৰতীয় বজাৰত ই জীপ কম্পাছ, মহিন্দ্ৰা এক্স ইউ ভি ৫০০ আৰু টাটা হেৰিয়াৰৰ সৈতে প্ৰতিযোগিতা কৰিব।