গোৱাৰ সাগৰৰ পাৰত নগ্ন হৈ দৌৰা ফটো শ্বেয়াৰ; মডেল-অভিনেতা মিলিন্দ সুমনক গ্ৰেপ্তাৰ
দক্ষিণ গোৱাৰ সাগৰৰ পাৰত নিজৰ নগ্ন হৈ দৌৰা ফটো আপোলোড কৰা মডেল তথা অভিনেতা মিলিন্দ সুমনক অশ্লীল আচৰণৰ বাবে গ্ৰেপ্তাৰ কৰা হৈছে।
দক্ষিণ গোৱাৰ আৰক্ষী অধীক্ষক পংকজ কুমাৰ সিঙে নিশ্চত কৰে যে অভিনেতাগৰাকীক ভাৰতীয় দণ্ডবিধিৰ ২৯৪ ধাৰা(অশ্লীলতা) আৰু তথ্য প্ৰযুক্তি আইনৰ আন প্ৰাসংগিক ধাৰাত অধীনত গ্ৰেপ্তাৰ কৰা হৈছে।
উল্লেখ্য যে, যোৱা ৪ নৱেম্বৰত জন্মদিন উপলক্ষে মিলিন্দ সুমনে এখন সম্পূৰ্ণ নগ্ন ছবি ছচিয়েল মিডিয়াত প’ষ্ট কৰিছিল।
তাত তেওঁক সাগৰৰ পাৰত নগ্ন হৈ দৌৰি থকা দেখা গৈছিল।
লগতে তেওঁ নিজকে জন্মদিনৰ শুভেচ্ছা জনাই ফটোৰ কেপশ্যনত লিখিছিল,’’হেপিডে বাৰ্থডে টু মি! #৫৫।‘’
এই ফটোখন তুলিছিল মিলিন্দ সুমনৰ পত্নী অংকিতা কোঁৱৰে।
২৫ বছৰ পূৰ্বে মডেল মধু চাপ্ৰে আৰু মিলিন্দ সুমনৰ এখন নগ্ন ফটোই দেশজুৰি তোলপাৰ লগাইছিল। জোতাৰ এটা ব্ৰেণ্ডৰ বিজ্ঞাপনৰ বাবে আছিল সেই ফটো। সম্পূৰ্ণ নগ্ন মধু আৰু মিলিন্দ। মাত্ৰ নগ্নতাক আবুৰ দিবলৈ মিলিন্দৰ ডিঙিত পাক খাই আছিল এডাল অজগৰ।
এইবাৰ আকৌ জন্মদিনত নগ্ন ফটো তুলি প’ষ্ট কৰি বিপদত পৰিল মিলিন্দ।