যোৰহাটত আয়োজিত মহিলা সমাৰোহত ভাষণ দিব প্ৰতিৰক্ষা মন্ত্ৰী নিৰ্মলা সীতাৰমনে
আন্তৰ্জাতিক নাৰী দিৱসৰ লগত সংগতি ৰাখি অসম বিজেপিয়ে আজি যোৰহাটত আয়োজন কৰিছে এক বিশাল মহিলা সমাৰোহ। যোৰহাট কছাৰী ময়দানত আয়োজিত এই সমাৰোহত উপস্থিত থাকিব কেন্দ্ৰীয় প্ৰতিৰক্ষা দপ্তৰৰ মন্ত্ৰী নিৰ্মলা সীতাৰমন।
আগন্তুক লোকসভা নিৰ্বাচনক কেন্দ্ৰ কৰি তথা প্ৰতিৰক্ষা মন্ত্ৰীগৰাকীৰ উপস্থিতি নিশ্চিত হোৱাত অতি আকস্মিকভাৱে এই মহিলা সমাৰোহখন আয়োজন কৰা হৈছে বুলি ৰাজ্যিক বিজেপিয়ে জানিবলৈ দিয়ে।
মহিলা সমাৰোহখনৰ বাবে ইতিমধ্যে সকলো প্ৰস্তুতি সম্পূৰ্ণ হৈ উঠাৰ লগতে সমাৰোহখনিত প্ৰায় ১০ হাজাৰ মহিলা বিজেপি কৰ্মীয়ে অংশগ্ৰহণ কৰিব বুলি বিজেপিৰ এক সূত্ৰই জনায়।
নাৰী দিৱসৰ লগত সংগতি ৰাখি আয়োজন কৰা সমাৰোহত অসমৰ মুখ্য মন্ত্ৰী সৰ্বানন্দ সোণোৱাল আৰু স্বাস্থ্য তথা বিত্ত মন্ত্ৰী হিমন্ত বিশ্ব শৰ্মাৰ লগতে ৰাজ্যিক বিজেপিৰ শীৰ্ষ পৰ্যায়ৰ নেতা-কৰ্মীসকল উপস্থিত থাকিব।
আনহাতে কেন্দ্ৰীয় প্ৰতিৰক্ষা মন্ত্ৰীগৰাকীয়ে এই সমাৰোহত অংশ লোৱাৰ উপৰি তেজপুৰত সেনাৰ সৈতে এক বিশেষ বৈঠকত মিলিত হ’ব। বৈঠকত সামগ্ৰীক পৰিস্থিতি সন্দৰ্ভত পৰ্যালোচনা কৰাৰ লগতে সংবাদমেল এখনতো অংশ ল’ব বুলি জানিব পৰা গৈছে।