প্ৰসূতিক কেন্দ্ৰ কৰি শিৱসাগৰত দুষ্কৃতিকাৰীয়ে ভাঙি লণ্ড-ভণ্ড কৰিলে চিকিৎসালয়ৰ আচবাব

শিৱসাগৰ জিলা স্বাস্থ্য বিভাগৰ অন্তৰ্গত বেতবাৰী মৌজাৰ খেলুৱা প্ৰাথমিক স্বাস্থ্য কেন্দ্ৰত শুকুৰবাৰে পুৱাই এগৰাকী প্ৰসূতিক কেন্দ্ৰ কৰি চিকিৎসালয় খনত তীব্র উত্তেজনাময় পৰিস্থিতিৰ সৃষ্টি হয়। উত্তেজনাৰ মাজতে একাংশ দুষ্কৃতিকাৰীয়ে মহকুমা স্বাস্থ্য বিষয়াৰ কাৰ্যালয় আৰু চিকিৎসালয়খনৰ আচবাবৰ যথেষ্ট ক্ষতিসাধন কৰে।

ঘটনা সন্দৰ্ভত চিকিৎসালয় কৰ্তৃপক্ষৰ তথ্য অনুসৰি শুকুৰবাৰে পুৱা খেলুৱা পঞ্চায়তৰ বেতবাৰী দুৱৰী গাঁৱৰ শিখামণি নামৰ প্ৰসূতি গৰাকীৰ হঠাৎ প্ৰসৱ বেদনা বাঢ়ি যোৱাত পুৱা খেলুৱা প্ৰাথমিক স্বাস্থ্য কেন্দ্ৰলৈ পৰিয়ালৰ লোকে লৈ আহে আৰু চিকিৎসকৰ অনুপস্থিতিত কৰ্তব্যৰত নাৰ্চে প্ৰসূতি গৰাকীক প্ৰাথমিক চিকিৎসা প্ৰদানৰ অন্তত ৰক্ত চাপৰ অধিক পৰিবৰ্তনৰ তাৰতম্য দেখি উন্নত চিকিৎসাৰ বাবে পৰিয়ালৰ বৰ্গক শিৱসাগৰলৈ নিবৰ বাবে পৰামৰ্শ দিয়ে।

কিন্তু দুৰ্ভাগ্যবশত উন্নত চিকিৎসাৰ বাবে যোৱাৰ পথতে গাড়ীতে  প্ৰসূতি গৰাকীয়ে এটি কেচুৱা প্ৰসৱ কৰে আৰু পৰৱৰ্তী সময়ত এখন ব্যক্তিগত চিকিৎসালয়ত ভৰ্তি হোৱাৰ পাছতে চিকিৎসকে জন্ম হোৱা শিশুটিৰ ইতিমধ্যে মৃত্যু হোৱা বুলি পৰিয়ালবৰ্গক জানিবলৈ দিয়ে।

চিকিৎসালয় সূত্ৰৰ মতে সম্পূর্ণ দিনৰ পূৰ্বেই শিশুটি প্ৰসৱ হোৱা বাবেই শিশুটি মৃত্যু মুখত পৰে বুলি ধাৰণা কৰা হৈছে, কিয়নো চিকিৎসালয়ৰ তথ্যত প্ৰসূতি গৰাকীৰ প্ৰসৱৰ সঠিক দিন আছিল ২৪ নৱেম্বৰ। ইফালে জ্যেষ্ঠ চিকিৎসকৰ মতে শিশুটোৰ মৃত্যুৰ কাৰণ এতিয়াও সঠিক ভাৱে পোহৰলৈ অহা নাই।

আনহাতে,  শিশুটিৰ আকস্মিক মৃত্যুৰ খবৰে পৰিয়াল বৰ্গক মৰ্মাহত কৰে আৰু একাংশ দুষ্কৃতিকাৰীয়ে খেলুৱাস্থিত মহকুমা স্বাস্থ্য বিষয়াৰ কাৰ্য্যালয়ত প্ৰৱেশ কৰি কম্পিউটাৰ, চি চি টিভি, দুৱাৰৰ আইনা ভঙাৰ লগতে চিকিৎসালয়ৰ লেব’ৰটৰি, ঔষধ গৃহৰ উপৰিও নৈশ চকীদাৰৰ কোঠাৰ দুৱাৰ ভাঙি লণ্ড ভণ্ড কৰি চিকিৎসালয় খনত এক উত্তেজনাময় পৰিস্থিতিৰ সৃষ্টি কৰে।  উল্লেখ্য যে যি সময়ত প্ৰসুতি গৰাকীক উন্নত চিকিৎসাৰ বাবে শিৱসাগৰলৈ নিয়া হৈছিল সেই সময়ত খেলুৱাস্থিত চিকিৎসালত নাছিল কোনো চিকিৎসক।

লক্ষণীয় বিষয়টো হ’ল যে যি সময়ত দুষ্কৃতিকাৰী চিকিৎসালয়ত প্ৰবেশ কৰি চিকিৎসালয়খন লণ্ড-ভণ্ড কৰিছিল তেতিয়া কৰ্তব্যত উপস্থিত থকা চিকিৎসকজনে মহকুমা স্বাস্থ্য বিষয়াক ফোনযোগে ঘটনা সন্দৰ্ভত অৱগত কৰে যদিও মহকুমা স্বাস্থ্য বিষয়াজন প্ৰায় ১-৩০ বজাতহে কাৰ্যালয়ত উপস্থিতি হয়হি। ইতিপূৰ্বে চেৰেকাপাৰ আৰক্ষীয়ে ঘটনাস্থলীত উপস্থিত হৈ পৰিস্থিতি নিয়ন্ত্রণ কৰে। আৰক্ষীয়ে সঠিক অনুসন্ধানৰ পাছতহে প্ৰকৃত দুষ্কৃতিকাৰীক কৰায়ত্ত কৰিব পৰা যাব বুলি জানিবলৈ দিছে।

ইপিনে ৰাজহুৱা সম্পত্তি চিকিৎসালয়খন ধ্বংস কৰাৰ বাবে সচেতন ৰাইজৰ মাজত যথেষ্ট প্ৰতিক্ৰিয়াৰ সৃষ্টি হৈছে। ৰাইজে  এই ক্ষেত্রত বিভাগীয় উৰ্ধতন কৰ্তৃপক্ষৰ উপৰিও জিলা উপায়ুক্তৰ হস্তক্ষেপৰ দাবী জনাইছে।