শ্ৰীৰামপুৰত দুৰ্বৃত্তই জ্বলাই দিলে আৰক্ষীয়ে জব্দ কৰা গাঞ্জা সৰবৰাহ কৰা ট্ৰাক

গোসাইগাঁও মহকুমাৰ শ্ৰীৰামপুৰত গাঞ্জা সৰবৰাহ কৰা এখন ট্ৰাক দুৰ্বৃত্তই জ্বলাই দিয়ে ৷ শিমুলটাপু আৰক্ষী চকীৰ কাষতে ৰখাই থোৱা অৱস্থাত ট্ৰাকখনত যোৱা নিশা দুৰ্বৃত্তই অগ্নিসংযোগ কৰে ৷

উল্লেখ্য যে  ২৬ জুলাইৰ বিয়লিৰ ভাগত শিমুলটাপু আৰক্ষীয়ে শ্ৰীৰামপুৰত ৩১ নম্বৰ ‘গ’ ৰাষ্ট্ৰীয় ঘাইপথত অভিযান চলাই ইউ পি ১৫ ডিচি ২২৬৪ নম্বৰৰ এখন  ট্ৰাক আটক কৰি তালাচী চলাওতে ট্ৰাকৰ গোপন চেম্বাৰৰ পৰা বৃহৎ পৰিমানৰ গাঞ্জা উদ্ধাৰ হৈছিল ৷

পিছত আৰক্ষীয়ে গাঞ্জা সমুহ জব্দ কৰাৰ লগতে ট্ৰাকৰ চালক মনিপুৰৰ নিবাসী মোঃ ফাৰুক হুছেইনক আটক কৰিছিল ৷

ট্ৰাকৰ গোপন চেম্বাৰৰ পৰা ১৩১ পেকেটত ১৯২০ কেজি গাঞ্জা উদ্ধাৰ হৈছিল ৷

জব্দকৃত সেই ট্ৰাকখন শিমুলটাপু আৰক্ষী চকীৰ কাষতে ৰখাই থোৱা আৱস্থাত আজি পুৱতি নিশা দুৰ্বত্তই অগ্নিসংযোগ কৰে ৷

অগ্নি নিৰ্বাপক বাহিনীৰ দ্বাৰা জুই নিৰ্বাপিত কৰা হয় যদিও ইতিমধ্যে ট্ৰাকৰ অধিকাংশ জ্বলি ছাৰখাৰ হয় ৷

চোৰাং বেপাৰীয়ে সকলো তথ্য নষ্ট কৰাৰ বাবে ট্ৰাকত অগ্নিসংযোগ কৰাইছে বুলি আৰক্ষীয়ে সন্দেহ কৰিছে ৷