আৰক্ষীক চুলাইৰ ঘাটিৰ খবৰ দিয়া বাবেই হত্যা যুৱকক; ৰাইজৰ দ্বাৰা চুলাইৰ দোকান লণ্ডভণ্ড

চহৰৰ তেলীয়া পট্টীত চলি থকা অবৈধ চুলাই ব্যৱসায়ৰ আৰক্ষীক খবৰ দি হত্যাৰ বলি হ’ব লগীয়া হ’ল এজন যুৱকে।

স্থানীয় ৰাইজে জনোৱা মতে, অঞ্চলটোৰ যুৱক আশিস বৰাই উক্ত স্থানত চুলাইৰ ব্যৱসায় চলাই থকা কিছু সংখ্যক লোকৰ বিৰুদ্ধে আৰক্ষীক অভিযোগ দিছিল। বিশেষকৈ নৱজ্যোতি দাসে শাক-পাচলিৰ পাইকাৰী দোকান দেখুৱাই চুলাই ব্যৱসায় কৰি আহিছিল।

আশিসৰ অভিযোগৰ পিছতে আৰক্ষীয়ে চুলাইৰ ঘাটিবোৰ উচ্ছেদ কৰিবলৈ এটা দল পঠায়।

কিন্তু আৰক্ষী গুচি যোৱাৰ পিছত চুলাইৰ ব্যৱসায়ী নৱজ্যোতি দাস নামৰ লোকজনৰ সৈতে আশিসৰ তৰ্কাতৰ্কি লাগে। তৰ্কাতৰ্কিৰ উত্তেজনাৰ মাজতে নৱজ্যোতি দাসে চোকা অস্ত্ৰেৰে আশিসক আক্ৰমণ কৰে। আক্ৰমণত আশিসৰ মৃত্যু হয়।

যুৱকজনক হত্যাত ক্ৰোধোম্মত্ত হৈ পৰা স্থানীয় ৰাইজে আজি চুলাইৰ দোকানবোৰ ভাঙি চূৰ্ণাকৃত কৰে। তেওঁলোকক ছত্ৰভংগ দিবলৈ আৰক্ষীয়ে মৃদু লাঠী চাৰ্জ কৰিব লগীয়া হয়।

ঘটনাৰ পিছতে নৱজ্যোতি দাস পলাতক হৈ থকাত আৰক্ষীয়ে তেওঁৰ দেউতাক পাচলি ব্যৱসায়ী অতুল দাসক নিশাই গ্ৰেপ্তাৰ কৰিছিল।

আজি কিছু সময়ৰ পূৰ্বে আৰক্ষী নৱজ্যোতি দাসকো গ্ৰেপ্তাৰ কৰিবলৈ সক্ষম হৈছে।

বাপেক-পুতেক দুয়োৰে বিৰুদ্ধে ভাৰতীয় দণ্ডবিধিৰ ধাৰা ৩০২ আৰু ১২০ বি ধাৰাত ৰুজু হৈছে।

মৃত আশিস আৰু হত্যাকাৰী চিণ্টু দাস দুয়োজনৰ ঘৰ গড়মূৰ অঞ্চলত।