৩১ মাৰ্চত ভিডিঅ’ কনফাৰেন্স কৰি মোদীয়ে অসমৰ ১৪টা স্থানৰ ভোটাৰৰ সৈতে মত বিনিময় কৰিব

বিজেপিৰ ৰাজ্যিক কাৰ্যালয়ত এখন সংবাদমেলত আজি শিক্ষা মন্ত্ৰী সিদ্ধাৰ্থ ভট্টাচাৰ্য্যই কয় যে ‘চকীদাৰ চোৰ’ কংগ্ৰেছে চলোৱা এটা অপপ্ৰচাৰ।

“নিৰ্বাচনী প্ৰচাৰৰ অংশ হিচাপেহে নৰেন্দ্ৰ মোদীয়ে নিজকে প্ৰধান সেৱক বুলি ধৰি লৈ চকীদাৰ শব্দটো ব্যৱহাৰ কৰিছিল। কিন্তু তাকে লৈ কংগ্ৰেছে অপপ্ৰচাৰ চলাইছে”, শিক্ষা মন্ত্ৰীজনে কয়।

টুইটাৰত মে’ ভি চকীদাৰ প্ৰচাৰ অভিযান বৰ্তমান এক জন আন্দোলনত পৰিণত হৈছে বুলি দাবী কৰে শিক্ষা মন্ত্ৰী গৰাকীয়ে।

মন্ত্ৰীজনে জানিবলৈ দিয়া মতে, ৩১ মাৰ্চৰ দিনা প্ৰধান মন্ত্ৰীগৰাকীয়ে ভাৰতৰ ৫০০টা স্থানত বিভিন্ন ব্যক্তিৰ সৈতে ভিডিঅ’ কনফাৰেন্সৰ জৰিয়তে মত বিনিময় কৰিব। বিভিন্ন ৰাজ্যৰ বিজেপিৰ নেতৃত্ব, প্ৰথম ভোটদান কৰা যুৱ ভোটাৰ, কৃষক, চিকিৎসক, কাৰ্য্যালয় কৰ্মচাৰীয়ে অংশগ্ৰহণ কৰিব। অসমৰো ১৪টা স্থানত হ’ব ভিডিঅ’ কনফাৰেন্স।

এই ভিডিঅ’ কনফাৰেন্সৰ সময়ত কৰিমগঞ্জত থাকিব পৰিমল শুক্লবদ্য, নগাঁৱত সিদ্ধাৰ্থ ভট্টাচাৰ্য্য, যোৰহাটত হিমন্ত বিশ্ব শৰ্মা, গুৱাহাটীত মুখ্য মন্ত্ৰী সৰ্বানন্দ সোণোৱাল, ডিফুত মন্ত্ৰী পীযুষ হাজৰিকা, কোকৰাঝাৰ চন্দ্রমোহন পাটোৱাৰী, তেজপুৰত মন্ত্ৰী ৰঞ্জিত দত্ত, ডিব্ৰুগড় ৰমেন ডেকা আৰু লখিমপুৰত নৱ কুমাৰ দলে উপস্থিত থাকিব।

আনহাতে, মন্ত্ৰী পল্লব লোচন দাসে ভানুক বুঢ়া গৰু আখ্যা দিয়া প্ৰসংগত সাংবাদিকে সোধা প্ৰশ্নৰ উত্তৰত ভট্টই কয়, “আমি সকলোৱে বিচাৰো শালীনতা বজাই ৰাখি নিৰ্বাচনত অৱতীৰ্ণ হোৱাটো ভাল। ৰাজনৈতিকভাৱে আন্দোলন হোৱাটো বিচাৰো। ব্যক্তিগত স্তৰলৈ তৰ্কবোৰ যাব নালাগে।”

মন্ত্ৰীজনে অসমৰ ৰাইজে এইবাৰ বিজেপিক বিপুল ভোটত জয়ী কৰিব বুলিও দাবী কৰে। সৰ্বানন্দ সোণোৱালৰ উন্নয়নমুখী কাম-কাজত জনসাধাৰণ আকৰ্ষিত হৈছে বুলি দাবী ভট্টৰ।

লক্ষণীয়ভাৱে প্ৰথম পৰ্য্যায়ৰ নিৰ্বাচনলৈ মাজত মাথো ১২ দিন থকাৰ পাছতো আজি পর্যন্ত প্ৰকাশ পোৱা নাই বিজেপিৰ নিৰ্বাচনী ইস্তাহাৰ। এই সম্পৰ্কত ভট্টাচাৰ্যই কয় “প্ৰেছত চপাবৰ বাবে পঠোৱা হৈছে ইস্তাহাৰ। দুই এদিনত প্ৰকাশ পাব ইস্তাহাৰ।

তদুপৰি গুৱাহাটী লোকসভা সমষ্টিৰ কংগ্ৰেছ প্ৰাৰ্থী ববিতা শৰ্মাক শুভেচ্ছা জনাই মন্ত্ৰী সিদ্ধাৰ্থ ভট্টাচাৰ্যই কয় “তেওঁ মোৰ লগতো নিৰ্বাচন খেলিছিল। তেওঁ অসমৰ ৰাইজৰ পৰা কি সঁহাৰি পালে সকলোৱে দেখিলে।”

গুৱাহাটী লোকসভা সমষ্টিত বিপুল ভোটৰ ব্যৱধানত জয়ী হ’ব বিজেপিৰ কুইন ওজা। এই দাবী মন্ত্ৰী ভট্টাচাৰ্যৰ।

ইপিনে কংগ্ৰেছ আৰু এ আই য়ু ডি এফে কিমান আসন পাব সেয়া স্পষ্ট কৰিছে কিন্তু মন্ত্ৰী জনে সৰহ সংখ্যক আসন বিজেপিয়ে লাভ কৰিব বুলি কোৱাত সাংবাদিকে কিমানখন আসন পাব বুলি প্ৰশ্ন কৰে। উত্তৰত শিক্ষা মন্ত্ৰী ভট্টাচাৰ্যই কয় “মই অংকত বেয়া। হিচাপ ইমান ভালকৈ নাজানো।”