মহাসতী ৰাধিকাৰ স্মৃতি দিৱস উদযাপন, অসমীয়া সমাজক মহীয়ান কৰা মহাসতী ৰাধিকা দৰাচলতে কোন আছিল ?

সতী ৰাধিকা এগৰাকী মহীয়সী নাৰী।তেওঁ কৈৱৰ্ত কুলৰ মাছমৰীয়া নদীয়াল পূৰ্ণানন্দৰ পত্নী আছিল। বৰদোৱাৰ ওচৰত টেম্বুৱানী জানে প্ৰতিবছৰে বাৰিষা কালত বৰদোৱাবাসীসকলৰ শস্য নষ্ট কৰাৰ বাবে ইয়াত বান্ধ দিবলৈ পৰিকল্পনা কৰা হৈছিল।

কেইবাবাৰো চেষ্টা কৰাৰ পিছতো প্ৰৱল সোঁতে সকলো উটুৱাই লৈ যোৱাৰ বাবে ৰাইজে মহাপুৰুষ শ্ৰীমন্ত শঙ্কৰদেৱৰ ওচৰলৈ আহিছিল। গুৰুজনাই এগৰাকী শান্তি বা সতী তিৰোতায়ে তিনিকাঠি পলেৰে পানী আনি জানত দিলে এয়া সম্ভৱ বুলি বিধান দিছিল।পূৰ্ণানন্দৰ পত্নী জয়ন্তীয়ে নিজকে সতী বুলি এয়া কৰিবলৈ আগবাঢ়ি আহিল আৰু তেওঁ তিনিকাঠি পলেৰে টেম্বুৱানী জানত পানী দিয়াৰ পিছত ৰাইজে এই জানত বান্ধ দিবলৈ সক্ষম হৈছিল।

ইয়াৰ পিছত গুৰুজনায়ে তেওঁক সতী ৰাধিকা নাম প্ৰদান কৰিছিল আৰু টেম্বুৱানী জান শান্তি জান হিচাপে জনাজাত হৈছিল।
এই গৰাকী পতিব্ৰতা সতীক সমগ্ৰ ৰাজ্যৰ লগতে শিৱসাগৰতো স্মৰণ কৰা হৈছে।

মহাসতী ৰাধিকা সোঁৱৰণি সাংস্কৃতিক মঞ্চ অসমৰ সৌজন্যত শিৱসাগৰৰ যুৱ দল প্ৰেক্ষাগৃহত দিনযোৰা কাৰ্য্যসূচীৰে মহিয়সী নাৰী গৰাকীক স্মৰণ কৰা হয়।

পতাকা উত্তোলন,সতী গৰাকীৰ প্ৰতিছবিত স্মৃতি তৰ্পন কৰাৰ লগতে স্মৃতি দিৱসৰ লগত সংগতি ৰাখি এক সাংস্কৃতিক শোভাযাত্ৰা উলিওৱা হয়।

উক্ত সাংস্কৃতিক শোভাযাত্ৰাত বিভিন্ন জাতি জনগোষ্ঠীৰ সাংস্কৃতি দলে অংশ গ্ৰহণ কৰে।

উদযাপন সমিতিয়ে সতী গৰাকীৰ আদৰ্শ যাতে চিৰ যুগমীয়া হৈ থাকে তাৰে কামনা কৰিছে।