এদিনতে ৫৫০তকৈ অধিক ফ্লাইট বাতিল! ২০ বছৰৰ ইতিহাসত ইণ্ডিগ’ৰ অভুতপূৰ্ব অভিলেখ

দেশৰ বৃহত্তম ব্যক্তিগত বিমান সংস্থা ইণ্ডিগ’ (Indigo) একেৰাহে তৃতীয় দিনাও অধিক বিশৃংখলতাৰ সন্মুখীন হৈছে। বৃহস্পতিবাৰে এদিনতে ৫৫০তকৈ অধিক ফ্লাইট বাতিল কৰা হৈছে – যিটো ২০ বছৰৰ ইতিহাসত এক নজিৰবিহীন ঘটনা। সংস্থাটোৰ মতে, ক্ৰু ৰোষ্টাৰ সমস্যা, প্ৰযুক্তিগত জটিলতা আৰু নতুন কৰ্মনীতি মিলি সমগ্ৰ দেশতে বিমান পৰিচালনা ব্যাহত হৈছে।

ইণ্ডিগ’ই দৈনিক প্ৰায় ২,৩০০খন ফ্লাইট পৰিচালনা কৰে আৰু দীৰ্ঘদিন ধৰি সময়ৰ ডেডলাইন বজাই ৰখাটোৱেই তেওঁলোকৰ পৰিচয়। কিন্তু বৃহস্পতিবাৰে এই হাৰ মাত্ৰ ১৯.৭ শতাংশলৈ হ্ৰাস পায়, য’ত মংগলবাৰৰ হাৰ আছিল ৩৫ শতাংশ। পৰিস্থিতি চম্ভালিবলৈ সংস্থাটোৱে আগন্তুক দুই-তিনি দিনত আৰু অধিক ফ্লাইট বাতিলৰ সম্ভাৱনা থকাৰ কথা পূৰ্বেই জনাই দিছে।

বৃহস্পতিবাৰে অসামৰিক বিমান পৰিবহন মন্ত্ৰালয় আৰু ডিজিসিএ -ই ইণ্ডিগ’ৰ শীৰ্ষ বিষয়াসকলৰ সৈতে আলোচনাত বহে। ইয়াৰ পিছত জনোৱা হয় যে পৰিচালনা স্বাভাৱিক কৰিবলৈ দ্ৰুত ৰূপৰেখা প্ৰস্তুত কৰা হৈছে। ইণ্ডিগ’ৰ মুখ্য কাৰ্যবাহী বিষয়া পিটাৰ এলবাৰ্ছ-য়ে কৰ্মচাৰীসকলক জনাইছে যে পুনৰ সেৱা সম্পূৰ্ণৰূপে সক্ৰিয় কৰাটো এক ‘অতি কঠিন লক্ষ্য’ হ’ব।

যোৱা কেইদিনমানত দেশৰ বিভিন্ন বিমানবন্দৰত বিমন বাতিল হোৱাৰ সংখ্যা এনেধৰণৰ:

মুম্বাই: ১১৮

বেংগালুৰু: ১০০

হায়দৰাবাদ: ৭৫

কলকাতা: ৩৫

চেন্নাই: ২৬

গোৱা: ১১

ইণ্ডিগ’ই স্বীকাৰ কৰিছে যে নতুন ফ্লাইট ডিউটি ​​টাইম লিমিটেশ্বন (FDTL)–ৰ দ্বিতীয় পৰ্যায় কাৰ্যকৰী হোৱাৰ পিছত সংস্থাৰ ক্ৰু-চাহিদা বৃদ্ধি পাইছে। আদালতৰ নিৰ্দেশত ১ নৱেম্বৰৰ পৰা আৰম্ভ হোৱা নতুন নিয়মানুসৰি, নিশাৰ ডিউটিৰ  সংজ্ঞা সলনি হোৱা আৰু পাইলটসকলৰ ডিউটি সময়ৰ কঠোৰ সীমাবদ্ধতাই ৰোষ্টাৰৰ ওপৰত অধিক হেঁচা পেলাইছে।

সংস্থাৰ সূত্ৰ অনুসৰি, ফেজ–২ আৰম্ভ হোৱাৰ পিছত বিশেষকৈ নিশাৰ বিমান পৰিচালনাত অতিৰিক্ত পাইলটৰ প্ৰয়োজনীয়তা বহু পৰিমাণে বৃদ্ধি পাইছে, য’ত স্লট কম আৰু ডিউটি-ৰুলছ অধিক কঠোৰ।

ইফালে, প্ৰযুক্তিগত সমস্যাইও বিপদ বৃদ্ধি কৰিছে। সংস্থাৰ অভ্যন্তৰীণ সূত্ৰই জনোৱা মতে, প্ৰযুক্তিগত সমস্যাই ৰোষ্টাৰিংৰ অভাৱো বৃদ্ধি কৰিছে। ইয়াৰ ফলত পূৰ্বনিৰ্ধাৰিত ফ্লাইট সূচী স্বাভাৱিক ৰাখিবলৈ বাৰে বাৰে পৰিৱৰ্তন কৰিবলগীয়া হৈছে।

কিন্তু ফেডাৰেচন অফ ইণ্ডিয়া পাইলটছ (FIP)-য়ে পোনপটীয়াকৈ ইণ্ডিগ’ৰ ওপৰত অভিযোগ উত্থাপন কৰিছে। তেওঁলোকৰ বক্তব্য, ইণ্ডিগ’ই দীৰ্ঘদিন ধৰি নিযুক্তি বন্ধ কৰি ৰাখিছে। ‘অস্বাভাৱিকভাৱে কম’ কৰ্মী আছে। ইয়াৰ উপৰিও সংস্থাই পাইলটসকলৰ দৰমহা স্থগিত কৰি ৰাখিছে। তেওঁলোকৰ বক্তব্য যে এই সকলোবোৰৰ ফলতেই আজি বিমান পৰিচালনা ব্যাহত হৈছে।

যদিও ইণ্ডিগ’ই কৈছে যে পৰিচালনা স্থিতিশীল নোহোৱালৈকে সূচীৰ সামঞ্জস্য কৰি চলিব। যাত্ৰীসকলৰ বাবে আপডেট জাৰি কৰিবলৈ সংস্থাই অতিৰিক্ত হেল্পডেস্ক আৰু জাননী ব্যৱস্থা আৰম্ভ কৰিছে।