মৰিগাঁৱত ফটকা বিক্ৰী আৰু ব্যৱহাৰত নিষেধাজ্ঞা জাৰি কৰিলে জিলা প্ৰশাসনে

আগন্তুক পোহৰৰ উৎসৱ দ্বীপাৱলী বা দীপান্বিতা উদযাপনৰ সময়ত অধিক মাত্ৰাত ফটকা আৰু আতচবাজী বিক্ৰী আৰু ব্যৱহাৰ নিষেধ্যাজ্ঞা জাৰি কৰিছে মৰিগাঁও জিলা প্ৰশাসনে ।

ফটকা,বোমা আদি আতছবাজীৰ শব্দৰ ফলত জনসাধাৰণৰ জীৱন আৰু সম্পত্তিৰ লোকচান হোৱাৰ উপৰিও শব্দ আৰু বায়ু প্ৰদূষণ সৃষ্টি কৰাৰ প্ৰতি লক্ষ্য ৰাখি মৰিগাঁও জিলা দণ্ডাধীশ লীনা দাসে ১৪৪ ধাৰাৰ অধীনত কেতবোৰ নিষেধাজ্ঞা আৰোপ কৰিছে |

সেই নিষেধাজ্ঞা অনুসৰি নিৰ্ধাৰিত মানৰ ওপৰৰ ফটকা আৰু আতচবাজী কোনো ব্যৱসায়ীয়ে বিক্ৰী আৰু ব্যৱহাৰ কৰিব নোৱাৰিব,নিশা ১০ বজাৰ পৰা পুৱা ৬ বজালৈ ফটকা ফুটাব নোৱাৰিব, ১২৫ বা ১৪৫ ডেচিবলৰ ওপৰৰ ফটকা ৪ মিটাৰৰ কম দুৰত্বত ফুটাব নোৱাৰিব, কোনো ধৰণৰ ৰকেট বোমা বিক্ৰী কৰিব নোৱাৰিব, পেট্ৰল পাম্প, এল পি জি গেছ বিক্ৰী কেন্দ্ৰ, পাৱাৰ হাউচ আদিত ১০০ মিটাৰ ব্যাসাৰ্দ্ধৰ ভিতৰত কোনো ফটকা ফুটাব নোৱাৰিব, পদপথ আৰু মুল পথত ফটকা বিক্ৰী বা ব্যৱহাৰ কৰিব নোৱাৰিব ।

এই নিৰ্দেশ ১৩ নৱেম্বৰৰ পৰা তৎকালে বলবৎ কৰা হৈছে বুলি জিলা তথ্য আৰু জনসংযোগ বিষয়া সুনীতি নাৰ্জাৰীয়ে এক প্ৰেছ বিবৃতিৰ জড়িয়তে জানিবলৈ দিয়ে ।