তেলেংগানাৰ সাংসদৰ প্ৰশংসিত পদক্ষেপ: ৮০০ বছৰ পুৰণি গছৰ সংৰক্ষণৰ বাবে ঘোষণা কৰিলে ২ কোটি টকাৰ অনুদান

উন্নয়নৰ নামত মানৱ জাতিয়ে প্ৰকৃতিৰ অবাধ ধ্বংসৰে পাৰিপাৰ্শ্বিক অৱস্থাটোৰ প্ৰতি এক ভয়াৱহ ভৱিষ্যতৰ আশংকা কঢ়িয়াই অনাৰ সময়তে তেলাংগানাৰ এগৰাকী সাংসদে প্ৰকৃতিৰ প্ৰতি থাকিবলগীয়া দায়বদ্ধতাৰ এক প্ৰশংসিত নিদৰ্শন দাঙি ধৰিছে।

তেলেংগানাৰ শাসনাধিষ্ঠ তেলেংগানা ৰাষ্ট্ৰ সমিতি দলৰ নেতা তথা ৰাজ্যসভাৰ সাংসদ যোগিনাপল্লী সন্তোষ কুমাৰে ৰাজ্যখনৰ পিল্লামাৰী নামেৰে জনাজাত এজোপা ৮০০ বছৰ পুৰণি বটগছ সংৰক্ষণৰ বাবে ২ কোটি টকাৰ অনুদান ঘোষণা কৰিছে।

সাংসদ যোগিনাপল্লী সন্তোষ কুমাৰে তেওঁৰ সমষ্টি উন্নয়নৰ বাবে নিৰ্ধাৰিত সাংসদ পুঁজিৰ পৰা গছজোপাৰ সংৰক্ষণৰ বাবে এই অনুদান আগবঢ়ায়।

এই পুঁজি ঘোষণা কৰি সাংসদগৰাকীয়ে কয় যে যিহেতু গছজোপাৰ সৈতে এক বৃহৎ ঐতিহাসিক সম্পৰ্ক আছে, সেয়েহে গছজোপাক সংৰক্ষণ কৰাৰ বাবে জনসাধাৰণ দায়বদ্ধ হোৱা উচিত।

চেলাইন ড্ৰিপ পদ্ধতিৰে এই বটগছ জোপা সংৰক্ষণ কৰা হৈছে। এক বৃহৎ ঠাইখণ্ড ৮০০ বছৰ পুৰণি এই বিশাল গছজোপাৰ শিপাৰো উন্নত মানদণ্ডৰ ব্যৱস্থাৰে যত্ন লোৱা হৈছে।

উল্লেখ্য যে বটগছক ভাৰত আৰু বিশ্বৰ অন্যান্য প্ৰান্তত এক বিশেষ অৰ্থপূৰ্ণ গছ হিচাপে গণ্য কৰা হয়। বটৰ সৈতে বহু জনগোষ্ঠীৰ এক আধ্যাত্মিক সম্পৰ্কও আছে।