সপৰিয়ালে বিজেপিলৈ যাব মেঘালয়ৰ কংগ্ৰেছ নেতা মুকুল চাংমা আৰু অসমৰ পৱন সিং ঘাটোৱাৰ

কংগ্ৰেছী নেতাৰে ভাৰাক্ৰান্ত হৈ পৰা বিজেপিলৈ যাবলৈ আৰু কেইবাজনো কংগ্ৰেছ নেতাই মন টঙাই থকাৰ খবৰ পোৱা গৈছে। বিজেপিয়ে ইয়াৰ সদস্যভৰ্তি অভিযান ২০ আগষ্টলৈকে বৃদ্ধি কৰাৰ মাজতে এই খবৰ পোৱা গৈছে।

খবৰ ওলাইছে আন এজন জ্যেষ্ঠ কংগ্ৰেছ নেতা পৱন সিং ঘাটোৱাৰৰ নামো।

কেৱল অসমৰে নহয়, উত্তৰ-পূবৰ আন ৰাজ্যৰ নেতাৰো একেই উৎসাহ দেখা গৈছে। মেঘালয়ৰ প্ৰাক্তন মুখ্য মন্ত্ৰী তথা ৰাজ্যখনৰ শক্তিশালী কংগ্ৰেছ নেতা তথা দুবাৰকৈ মুখ্য মন্ত্ৰী হোৱা মুকুল চাংমাও যাব পাৰে বুলি চৰ্চা হোৱা দেখা গৈছে।

ইতিমধ্যে ৰাজ্যসভাৰ পৰা পদত্যাগ কৰা ভুৱনেশ্বৰ কলিতাই দিল্লীতে গেৰুৱা দলটোত যোগদান কৰিছে। কাইলৈ হেঙেৰাবাৰীৰ অসম বিজেপিৰ কাৰ্য্যালয়ত কেইবাজনো জ্যেষ্ঠ কংগ্ৰেছ নেতাই যোগদান কৰিব। তেওঁলোকৰ ভিতৰত গৌতম ৰয়, শান্তিয়াছ কুজুৰ অন্যতম।

ৰাজনৈতিক মহলৰ এটা সূত্ৰৰ দাবী, মুকুল চাংমা আৰু পৱন সিং ঘাটোৱাৰ বিজেপিৰ সৈতে সঘন যোগাযোগত আছে।

চাংমা বৰ্তমান মেঘালয় বিধানসভাৰ বিৰোধী দলৰ নেতা হৈ আছে।

তেওঁৰ পত্নী ডিক্কান্সি ডি শ্বিৰা, ভায়েক জেনিথ এম চাংমা আৰু জীয়েক মিয়ানি দলবট শ্বিৰাও ৰাজ্যখনত কংগ্ৰেছী বিধায়ক-বিধায়িকা। সূত্ৰটোৰ দাবী, গোটেই চাংমা পৰিয়ালটোৱেই বিজেপিত যোগাদান কৰাৰ সম্ভাৱনা আছে।

নৰ্থ-ইষ্ট নাওৰ তৰফৰ পৰা চাংমাক এই বিষয়ত মত ল’বৰ বাবে যোগাযোগ কৰা হৈছিল যদিও ফোনত পোৱা নগ’ল।

চাংমাৰ দৰেই পৱন সিং ঘাটোৱাৰেও তেওঁৰ পত্নী জীৱনতাৰা ঘাটোৱাৰ সহ গেৰুৱা দলটোত যোগদান কৰাৰ সম্ভাৱনা আছে, সূত্ৰটোৱে কয়। ঘাটোৱাৰৰ সৈতে কৰা যোগাযোগৰ চেষ্টাও সফল নহ’ল।

আনপিনে, ভৰত নৰহ আৰু তেওঁৰ পত্নী তথা ৰাজ্যসভাৰ সাংসদ ৰাণী নৰহেও কাইলৈ গেৰুৱা দলটোত যোগদান কৰাৰ কথা।