“কা-ৰ বিষয়ে দহটা বাক্য কওক”, ৰাহুল গান্ধীক প্ৰত্যাহ্বান জে পি নড্ডাৰ

বিজেপিৰ ৰাষ্ট্ৰীয় কাৰ্য্যবাহী সভাপতি জে পি নাড্ডাই শনিবাৰে গুৱাহাটীত বুথ-পৰ্য্যায়ৰ কাৰ্য্যকৰ্তাৰ সভাত নাগৰিকত্ব (সংশোধন) আইনক লৈ কংগ্ৰেছ বিশেষকৈ ৰাহুল গান্ধীক চোকা আক্ৰমণ কৰিছে।

কা-ৰ বিষয়ে দহটা বাক্য আৰু আপোনাৰ (ৰাহুল গান্ধীৰ) ইয়াত আপত্তিক লৈ দুটা বাক্য কওক, মোদী চৰকাৰৰ প্ৰাক্তন স্বাস্থ্য মন্ত্ৰীজনৰ কংগ্ৰেছ নেতাজনক প্ৰত্যাহ্বান।

ৰাহুল গান্ধীক পক্ষপাতদুষ্ট বুলি অভিহিত কৰি বিজেপি নেতাজনে কয় যে কংগ্ৰেছৰ কাৰণে দেশতকৈ ভোট ডাঙৰ, কিন্তু তেওঁলোকৰ বাবে দেশ ভোট আৰু ৰাজনীতিৰ ঊৰ্ধ্বত।

“তেওঁলোকে (কংগ্ৰেছ) কৈ আছে পাছপ’ৰ্ট বিচৰা হ’ব, আধাৰ কাৰ্ড বিচৰা হ’ব ইত্যাদি। এইবোৰ কা-ৰ বিষয়ে অজ্ঞতা। আমি নাগৰিকত্ব দিব খুজিছো, কা-ৰ যোগেদি কাৰো নাগৰিকত্ব কাঢ়িব খোজা নাই,” নাড্ডাই কয়।

কা-ৰ যোগেদি কোনো নতুন মানুহ নাহে বুলি উল্লেখ কৰি নাড্ডাই কয় যে কংগ্ৰেছৰ দিনৰ পৰাই দেশত থকাসকলকহে কেৱল নাগৰিকত্ব দিব খোজা হৈছে।

“আমি কেৱল সেই লোকসকলক মৰ্য্যাদা সহকাৰে জীয়াই থকাৰ এক সুযোগ দিছো।”

LIVE: Shri @JPNadda addresses Booth Sammelan in Guwahati, Assam. https://t.co/EihsRC8drk

— BJP (@BJP4India) January 4, 2020

কা-ই সামৰি লোৱা চুবুৰীয়া দেশকেইখনত সংখ্যালঘুক নিপীড়নৰ প্ৰসংগত বিজেপি নেতাজনে তাত হ্ৰাস পোৱা শিখ আৰু হিন্দু জনসংখ্যাৰ উদাহৰণ দাঙি ধৰে।

“আগতে আফগানিস্তানত ৫০হাজাৰ শিখ আছিল, এতিয়া ২০০০ আছে। পাকিস্তানত ২৩ শতাংশ হিন্দু আছিল, এতিয়া আছে মাত্ৰ ৩ শতাংশ। সেই ২০ শতাংশ ক’লৈ গ’ল?” তেওঁৰ প্ৰশ্ন।

পাকিস্তানত অসুবিধা পোৱাসকলক ভাৰতলৈ ঘূৰি আহিবলৈ মহাত্মা গান্ধীয়ে জনোৱা আহ্বানৰ উল্লেখ কৰি বিজেপিৰ ৰাষ্ট্ৰীয় নেতাজনে কা যুক্তিযুক্ত বুলি অভিহিত কৰে।

“জৱাহৰলাল নেহৰুৱেও কৈছিল যে পাকিস্তানত নিপীড়িতসকলক সহায় কৰাটো ভাৰত চৰকাৰৰ দায়িত্ব,” তেওঁ কয়।

নাড্ডাই সভাত উপস্থিত থকা বিপুলসংখ্যক বুথ-পৰ্য্যায়ৰ সভাপতি আৰু কৰ্মীক অভিনন্দন জ্ঞাপন কৰে আৰু কয় যে বিজেপিয়ে হৈছে ভাৰতৰ একমাত্ৰ দল যি এক আদৰ্শ মানি চলে আৰু তাৰ ভিত্তিত দেশৰ উন্নতিৰ কাৰণে পৰিৱৰ্তন আনিব খোজে।

ভাৰতীয় সংসদে পাছ কৰা আৰু ইতিমধ্যে ৰাষ্ট্ৰপতি অনুমোদিত আইনখনক লৈ অসমৰ লগতে দেশৰ বিভিন্ন ঠাইত প্ৰতিবাদ হৈছে।

আইনখনে ২০১৪ চনৰ ৩১ ডিচেম্বৰলৈকে বাংলাদেশ, পাকিস্তান আৰু আফগানিস্তানত ধৰ্মীয় নিপীড়নৰ বলি হৈ ভাৰতত প্ৰৱেশ কৰা হিন্দু, শিখ, জৈন, পাৰ্ছি, বৌদ্ধ আৰু খ্ৰীষ্টান লোকক নাগৰিকত্ব প্ৰদান কৰিব খুজিছে।