অসম সীমান্ত জিলাসমূহৰ পৰা উচ্ছেদ কৰা লোকৰ আই এল পি বাতিল কৰিবলৈ আহ্বান নগা ছাত্ৰ ফেডাৰেচনৰ

বৰ্তমান উচ্ছেদ অভিযান চলাই থকা অসমৰ জিলাসমূহৰ বাসিন্দাক প্ৰদান কৰা ইনাৰ লাইন পাৰ্মিট (আই এল পি) শীঘ্ৰে বাতিল কৰাৰ বাবে দাবী জনাইছে নগা ষ্টুডেণ্টছ ফেডাৰেচনে। ইতিমধ্যে ইনাৰ লাইন ৰেগুলেচন কমিছনৰ আবেদন দাখিল কৰিছে সংগঠনটোৱে।

নগালেণ্ডৰ মুখ্য সচিবলৈ প্ৰেৰণ কৰা এক স্মাৰক পত্ৰত সংগঠনটোৱে ২০২৫ চনৰ ২৯ জুলাইত অসম চৰকাৰে আৰম্ভ কৰা বৃহৎ পৰিসৰৰ উচ্ছেদ অভিযানক লৈ উদ্বেগ প্ৰকাশ কৰে। লগতে, নাগালেণ্ডৰ সীমাত উচ্চেদিত লোকসকল আই এল পি বাতিলৰ দাবী জনায়।

নগা ষ্টুডেণ্টছ ফেডাৰেচনে আশংকা প্ৰকাশ কৰে যে স্থানচ্যুত ব্যক্তিয়ে আই এল পি লাভ কৰি নাগালেণ্ডত প্ৰৱেশৰ চেষ্টা কৰিব পাৰে, যাৰ ফলত খিলঞ্জীয়া সম্প্ৰদায়ৰ নিৰাপত্তা আৰু জনগাঁথনিগত ভাৰসাম্যত সম্ভাৱ্য প্ৰভাৱ পৰিব। ফেডাৰেচনে আলোকপাত কৰে যে ইতিমধ্যে নাগালেণ্ডৰ সীমান্ত জিলাসমূহলৈ উচ্ছেদিত লোকৰ সম্ভাৱ্য আগমনৰ সন্দৰ্ভত পৰামৰ্শ জাৰি কৰা হৈছে।