অৱশেষত নাগালেণ্ড চৰকাৰে নিষিদ্ধ কৰিলে কুকুৰ আৰু কুকুৰৰ মাংসৰ বিক্ৰী

পশুপ্ৰেমীসকলৰ দীৰ্ঘদিনীয়া আন্দোলনৰ ফলত অৱশেষত নাগালেণ্ড চৰকাৰে ৰাজ্যখনত কুকুৰৰ মাংস বিক্ৰী নিষিদ্ধ কৰিছে।

কেবল সেয়াই নহয়, ৰাজ্যৰ পৰা কুকুৰ আৰু কুকুৰৰ মাংসৰ ৰপ্তানিও সম্পূৰ্ণ বন্ধ কৰিছে নাগালেণ্ড চৰকাৰে।

শুকুৰবাৰে নাগলেণ্ড চৰকাৰৰ মুখ্য সচিব টেমজেন টয়ে নাগালেণ্ড চৰকাৰে কুকুৰ আৰু কুকুৰৰ মাংস সম্পূৰ্ণৰূপে বন্ধ কৰি দিয়াৰ কথা জানিবলৈ দিয়ে।

এতিয়াৰে পৰা ৰাজ্যখনত আৰু কুকুৰৰ মাংস কেঁচা বা ৰন্ধা অৱস্থাত বিক্ৰী কৰিব নোৱাৰিব। এনেদৰে মাংসৰ বজাৰসমূহ বন্ধ কৰাৰ নিৰ্দেশ দিয়াৰ লগতে কুকুৰৰ ব্যৱসায়িক আমদানি সম্পূৰ্ণৰূপে বন্ধ কৰাৰ নিৰ্দেশ দিয়া হৈছে।

মুখ্য মন্ত্ৰী নেফিউ ৰিঅ’ৰ নেতৃত্বত মন্ত্ৰীসভাৰ বৈঠকত এই সিদ্ধান্ত গ্ৰহণ কৰা হয়।

উল্লেখ্য যে উত্তৰ পূৰ্বাঞ্চলৰ অন্যতম ৰাজ্য নাগালেণ্ডৰ বহু লোকৰ প্ৰিয় খাদ্য কুকুৰৰ মাংস।

ৰাজ্যখনৰ ডিমাপুৰকে ধৰি অন্যান্য বহু অঞ্চলত কুকুৰৰ মাংসৰ ৰমৰমীয়া ব্যৱসায় চলি আহিছে।

অসমৰ পৰা ৫০ টকা ব্যয় কৰি লৈ যোৱা প্ৰতিটো কুকুৰ নাগালেন্ডত বিক্ৰী হয় ১০০০ টকাত। এই অভিযোগ পশুপ্ৰেমী সংগঠনৰ তৰফৰ পৰা উত্থাপন কৰা হৈছিল।

দেশৰ ৭০ খন চহৰত বিস্তৃত হৈ থকা ফেডাৰেছন অৱ ইণ্ডিয়ান এনিমেল প্ৰটেকশ্যন অৰ্গেনাইজেশ্যনে নাগালেণ্ডৰ কুকুৰৰ মাংসৰ বৃহৎ বজাৰখন সন্দৰ্ভত কেতবোৰ তথ্য দাঙি ধৰিছিল।

সংগঠনটোৰ কাৰ্যবাহী সঞ্চালক ভদ্ৰ মেৰহোত্ৰাই সদৰী কৰা অনুসৰি ডিমাপুৰৰ বজাৰত অতি দুখ লগা অৱস্থাত কুকুৰবোৰ বিক্ৰীৰ বাবে ৰখা হয়।

ৰাজ্যখনত প্ৰতি কিলোগ্ৰাম কুকুৰৰ মাংস ২০০ টকাকৈ বিক্ৰী হৈ আছে বুলিও তেওঁ উল্লেখ কৰিছিল।