১৫ নৱেম্বৰত বিহাৰৰ পৰৱৰ্তী মুখ্যমন্ত্ৰী নিৰ্বাচন কৰিব এনডিএই: নীতিশ কুমাৰৰ ঘোষণা

বিহাৰৰ পৰৱৰ্তী মুখ্যমন্ত্ৰী কোন হ’ব তাকেলৈ এতিয়া নতুনকৈ জল্পনা-কল্পনা আৰম্ভ হৈছে।যদিও বিহাৰ বিধান সভাৰ নিৰ্বাচনৰ পূৰ্বে এনডিএই ঘোষণা কৰিছিল যে বিহাৰত এনডিএৰ নেতৃত্বত গঠন হ’বলগীয়া চৰকাৰৰ পৰৱৰ্তী গৰাকী মুখ্যমন্ত্ৰী নীতিশ কুমাৰেই হ’ব ।

তথাপি শেহতীয়াকৈ যেন এই প্ৰতিশ্ৰুতি পূৰণ কৰাৰ ক্ষেত্ৰত এনডিএৰ অন্যতম দল বিজেপিৰ লগতে নীতিশ কুমাৰৰ দল জনতা দল ইউনাইটেডেও কিছু পিছহোঁহকা দেখা গৈছে।

ফলত নীতিশ কুমাৰ পুনৰ বিহাৰৰ মুখ্যমন্ত্ৰী হোৱাৰ বিষয়টোলৈ নামি আহিছে জটিলতা।

এনে সময়তে আজি নীতিশ কুমাৰে এইবুলি ঘোষণা কৰে যে বিহাৰৰ পৰৱৰ্তী মুখ্যমন্ত্ৰী কোন হ’ব সেয়া ১৫ নৱেম্বৰত এনডিএই নিশ্চিত কৰিব।

১৫ নৱেম্বৰৰ দিনা দিনৰ ১২.৩০ বজাত অনুষ্ঠিত হ’বলগীয়া এনডিএৰ বৈঠকতে বিহাৰৰ পৰৱৰ্তী মুখ্যমন্ত্ৰী কোন হ’ব সেই বিষয়ত সিদ্ধান্ত লোৱা হ’ব বুলি কুমাৰে প্ৰকাশ কৰে।

উল্লেখ্য এইবাৰ বিহাৰ বিধানসভাৰ নিৰ্বাচনত এনডিএই লাভ কৰিছে মুঠ ১২৫ খন আসন। ইয়াৰে ৭৪ খন আসন লাভ কৰিছে বিজেপিয়ে আৰু ৪৩ খন আসন লাভ কৰিছে জনতা দল ইউনাইটেডে।

২৪৩ জনীয়া বিহাৰ বিধান সভাত চৰকাৰ গঠন কৰিব পৰাকৈ এনডিএৰ প্ৰয়োজনতকৈ ৩ খন আসন বেছি আছে।