২০০৮ ৰ গণহত্যা : ক্ষমা খুজিবলৈ কুন্ঠাবোধ ৰঞ্জন দৈমাৰীৰ!

২০০৮ চনৰ ৩০ অক্টোবৰ বোমা বিস্ফোৰণৰ মূল অভিযুক্ত তথা এন ডি এফ বি প্ৰধান ৰঞ্জন দৈমাৰীয়ে সেই গণহত্যাক লৈ ক্ষমা খুজিবলৈ কুন্ঠাবোধ কৰা পৰিলক্ষিত হ’ল।

বহু নীৰিহ লোকৰ প্ৰাণ লৈ অথবা শতাধিক লোকক পঙ্গু কৰিও যেন অনুতপ্ত নহয় ৰঞ্জন দৈমাৰী।

বৃহস্পতিবাৰে গুৱাহাটী মেডিকেল কলেজ প্ৰেক্ষাগৃহত ১৬১৫ গৰাকী এনডিএফবি কেডাৰে অস্ত্ৰ সম্বৰণ অনুষ্ঠানত অংশগ্ৰহণ কৰাৰ পাছত সাংবাদিকৰ সৈতে মুখা-মুখি হোৱাত তেওঁক সোধা হৈছিল কেতবোৰ প্ৰশ্ন।

ইয়াৰ মাজতে অন্যতম আছিল ২০০৮ ৰ অভিশপ্ত ৩০ অক্টোবৰৰ ধাৰাবাহিক বিস্ফোৰণৰ প্ৰসংগ।

দৈমাৰীয়ে সকলো প্ৰশ্নৰ উত্তৰ দি গ’ল যদিও সাংবাদিকে সোধা শেষৰ প্ৰশ্নটোৰ উত্তৰ দিওঁতে নীৰৱ হৈ পৰা পৰিলক্ষিত হ’ল।

সাংবাদিকৰ প্ৰশ্ন ‘আপোনাৰ কথা কোৱাৰ লগে লগে ধাৰাবাহিক বিস্ফোৰণৰ কথাটোও আহে। আজি এই মুহূৰ্তত ক’ব নেকি আপুনি অনুতপ্ত বা আপুনি ক্ষমা খুজিব নেকি? অসমৰ স্বাৰ্থত এই কথাটো কৈছো।‘

কিন্তু প্ৰশ্ন শুনিয়েই যেন মুখৰ মাত হৰিল ৰঞ্জন দৈমাৰীৰ। মুখেৰে একো মাত নমতাটো বাদেই তেওঁ পলায়ণ কৰাহে পৰিলক্ষিত হয়।

অৱশ্যে, এই বড়ো শান্তি চুক্তি আৰু NDFB কেডাৰৰ আত্মসমৰ্পনে বড়ো ৰাইজৰ মাজলৈ শান্তি, একতা আৰু উন্নতি আনিব বুলি দাবী কৰে দৈমাৰীয়ে।

তেওঁ আৰু কয়, ‘বড়োসকলৰ মাটি আৰু পৰিচয় সুৰক্ষিত কৰিব। ৰাজনৈতিক আশা-আকাংক্ষা সুৰক্ষিত কৰিব বুলি আশা কৰিছো। বড়ো চুক্তিৰ দফা ৰাজ্য চৰকাৰে, ভাৰত চৰকাৰে আমাক কোৱাধৰণে কাৰ্য্যকৰী কৰিব বুলি আমি আশাবাদী।‘

উল্লেখযোগ্য যে এন ডি এফ বি সশস্ত্ৰ বিদ্ৰোহী গোটে সংঘটিত কৰা বিস্ফোৰণলানি ইমানেই ভয়ংকৰ আছিল যে ইয়াৰ ফলত মুঠ ৮৮ জন লোক নিহত আৰু ৪৭০জন আহত হৈছিল। ইয়াৰ নৃশংসতাই সমগ্ৰ ৰাজ্যৰ অন্তৰাত্মা কঁপাই গৈছিল।

গুৱাহাটীৰ গণেশগুৰি, পাণবজাৰ আৰু ফাঁচিবজাৰৰ লগতে বৰপেটাৰোড, বঙাইগাঁও আৰু কোকৰাঝাৰত একে সময়তে কেইবাটাও শক্তিশালী বোমা বিস্ফোৰিত কৰা হৈছিল।