সমগ্ৰ উত্তৰ-পূৰ্বাঞ্চলত ইনাৰ লাইন পাৰ্মিট প্ৰৱৰ্তনৰ দাবী উত্তৰ-পূব ছাত্ৰ সন্থাৰ
কেন্দ্ৰীয় গৃহ মন্ত্ৰ্যালয়ে অসমত বাস কৰা গোৰ্খাসকল বিদেশী নহয় বুলি বুধবাৰে স্পষ্ট কৰাৰ পিছতে ইয়াৰ প্ৰতিক্ৰিয়া প্ৰকাশ কৰি উত্তৰ-পূব ছাত্ৰ সন্থা চমুকৈ নেছ’ৱে ভাৰত-নেপাল চুক্তি যাতে উত্তৰ-পূৰ্বাঞ্চলত কাৰ্যকৰী নহয় তাৰ দাবী জনাইছে।
বৃহস্পতিবাৰে নতুন দিল্লীৰ প্ৰেছ ক্লাব অব্ ইণ্ডিয়াত এখন সংবাদ মেলত নে’ছৰ অধ্যক্ষ ছেমুৱেল বি জাইৰৱা, সাধাৰণ সম্পাদক ছিনাম প্ৰকাশ সিং আৰু উপদেষ্টা ডঃ সমুজ্জ্বল কুমাৰ ভট্টাচাৰ্যই বিদেশী নেপালী নাগৰিকসকলক উত্তৰ-পূৰ্বাঞ্চলত বসতি স্থাপন কৰি কাম কৰিবলৈ দিব নালাগে বুলি মত ব্যক্ত কৰে।
গোৰ্খাসকলেও আনকি ইয়াৰ বিৰোধিতা কৰিছে বুলি উল্লেখ কৰি নেছ’ৰ উপদেষ্টা ভট্টাচাৰ্যই কয় যে সদৌ অসম গোৰ্খা ছাত্ৰ সন্থাই ভাৰত-নেপাল চুক্তিৰ বিৰোধিতা কৰিছে আৰু ইয়াক প্ৰত্যাহাৰ কৰাৰ বাবে আন্দোলন কৰিছে।
ভট্টাচাৰ্যই লগতে কয়,‘‘কেন্দ্ৰীয় চৰকাৰে অসমত বিভাজনৰ ৰাজনীতি কৰিছে। অসমত বছৰ বছৰ ধৰি বসবাস কৰি থকা গোৰ্খাসকল নতুন অনুপ্ৰৱেশকাৰীসকলৰ পৰা ভাবুকিৰ সন্মুখীন হৈছে।‘‘
নে’ছৱে খিলঞ্জীয়া লোকসকলৰ সুৰক্ষাৰ স্বাৰ্থত উত্তৰ-পূৰ্বাঞ্চলৰ প্ৰতিখন ৰাজ্যতে ইনাৰ লাইন পাৰ্মিট (আন্তঃৰাজ্যিক পাৰপত্ৰ)ৰ ব্যৱস্থা কৰিবলৈ দাবী জনায়।
উল্লেখযোগ্য যে ভাৰত-নেপাল চুক্তি অনুসৰি যদি নেপালৰ পৰা প্ৰৱেশ কৰা কোনো লোকৰ হাতত নেপালৰ পাছপ’ৰ্ট, নাগৰিকত্ব প্ৰমাণ-পত্ৰ, ভোটাৰ পৰিচয়-পত্ৰ, নেপালী দূতাৱাসে জাৰি কৰা সীমিত বৈধতাৰ ফটো পৰিচয়-পত্ৰ থাকে অথবা ১০-১৮ বছৰ বয়সৰ নাগৰিকৰ বিদ্যালয়ৰ অধ্যক্ষই প্ৰদান কৰা ফটো পৰিচয়-পত্ৰ থাকে, লগতে পিতৃ-মাতৃৰ বৈধ ভ্ৰমণৰ নথি-পত্ৰ থাকে তেনেহ’লে তেওঁক অবৈধ প্ৰব্ৰজনকাৰী বুলি ধৰা নহয়।
আনহাতে, ১৯৫০ চনত স্বাক্ষৰিত ভাৰত-নেপাল চুক্তি অনুসৰি দহ বছৰৰ তলৰ শিশুক উক্ত কোনো ধৰণৰ নথিৰ প্ৰয়োজন নাই বুলি বুধবাৰে কেন্দ্ৰীয় চৰকাৰে স্পষ্ট কৰিছিল।