টয়লেটত ’বুলু ফিল্ম’! দৰাচলতে কি হৈছে এয়া?

অসমীয়া ছবি উদ্যোগটোৱে প্ৰত্যাব্হানৰ সন্মুখীন হোৱাৰ সময়তে আশাৰ বতৰা লৈ আহি আছে আন এখন অসমীয়া ছবি।৯ চেপ্তেম্বৰত সমগ্ৰ অসমৰে ছবিগৃহত মুক্তি লাভ কৰিব গুৱেৰ্ণিকাৰ নতুন চিনেমা হিমাংশু প্ৰসাদ দাস পৰিচালিত ’বুলু ফিল্ম’ ।

ছবি খনৰ প্ৰচাৰৰ বাবে পৰিচালকে অভিনৱ পদ্ধতি গ্ৰহণ কৰা পৰিলক্ষিত হৈছে। টিভি অথবা অন্যান্য প্ৰচাৰ সমাধ্যমৰ সলনি পৰিচালকে ছবি খনৰ প্ৰচাৰৰ বাবে বাছি লৈছে শৌচাগাৰ, প্ৰস্বাৱখানা আদিহে! চিনেমা এখনৰ প্ৰচাৰৰ দিশটো অতিকৈ গুৰুত্বপূৰ্ণ। বহু ভাল চিনেমা প্ৰচাৰৰ অভাৱত দৰ্শকৰ সঁহাৰি লাভৰ পৰা বঞ্চিত হয়।

কিন্তু এইক্ষেত্ৰত ছবি পৰিচালক হিমাংশু প্ৰসাদ দাসক কিছু ব্যতিক্ৰম দেখা গৈছে। তেওঁ ইতিপূৰ্বে নিৰ্মাণ কৰা প্ৰতিখন চিনেমাৰ প্ৰচাৰৰ ক্ষেত্ৰত অভিনৱত্ব দেখা গৈছিল। শেহতীয়াভাৱে মুক্তিৰ অপেক্ষাত থকা ’বুলু ফিল্ম’ৰ প্ৰচাৰো তীব্ৰ গতিত অব্যাহত আছে। ছ’চিয়েল মিডিয়াত উপলব্ধ সকলো উপকৰণ আৰু উপাদানৰ সঠিক ব্যৱহাৰেৰে চলোৱা প্ৰচাৰে দৰ্শকৰ মনত ’বুলু ফিল্ম’ৰ সন্দৰ্ভত এক আগ্ৰহৰ জন্ম দিয়া পৰিলক্ষিত হৈছে।

অভিনৱ প্ৰচাৰ কৌশলৰ এক নতুন নিদৰ্শন হিচাপে দেখা গৈছে যে গুৱাহাটীৰ বিভিন্ন ৰেষ্টুৰেন্টৰ প্ৰস্বাৱগাৰৰ লগতে ৰাজহুৱা প্ৰস্বাৱগাৰত আঁৰি দিয়া হৈছে ’বুলু ফিল্ম’ৰ পোষ্টাৰ। ইয়াৰ পূৰ্বে এইদৰে টয়লেটত চিনেমাৰ পোষ্টাৰ লগোৱা দেখা যোৱা নাছিল। যিহেতু বিভিন্ন অনুষ্ঠান প্ৰতিষ্ঠানৰ প্ৰস্বাৱগাৰলৈ সমাজৰ ভিন্নস্তৰৰ লোক যায়, সেই সকলো লোকৰে চকুত নিশ্চিতভাৱেই পোষ্টাৰখন পৰিব।

ই ’বুলু ফিল্ম’ৰ বিষয়ে সেই মুহূৰ্তলৈকে গম নোপোৱা লোককো জানিবলৈ বাধ্য কৰাব যে অহা ৯ চেপ্তেম্বৰত সমগ্ৰ অসমৰে ছবিগৃহত মুক্তি লাভ কৰিব গুৱেৰ্ণিকাৰ নতুন চিনেমা হিমাংশু প্ৰসাদ দাস পৰিচালিত ’বুলু ফিল্ম’।