যৌতুকৰ বলি? পুৱাই দুৱাৰ খুলি পিতৃয়ে দেখিলে দুৱাৰমুখত পৰি থকা নৱবিবাহিতা কন্যাৰ মৃতদেহ!

তেতিয়া ফেঁহুজালি দিছিলহে। পুৱাই ঘৰৰ মূল দুৱাৰখন খোলাৰ লগে লগে সকলোৱে থতমত খালে। ঘৰৰ নৱবিবাহিতা ছোৱালীজনীৰ মৃতদেহটো দুৱাৰমুখতে পৰি আছিল! এনে এক মৰ্মান্তিক দৃশ্যৰ সাক্ষী হ’ল বিহাৰৰ পিৰিয়া বজাৰৰ বাসিন্দাসকল। তাৰ পিছৰে পৰাই সমগ্ৰ অঞ্চলটোত ক্ষোভ বিয়পি পৰিছে।

চিচিটিভি ফুটেজত দেখা গৈছে যে নিশা প্ৰায় ১২:৩০ বজাত এখন গাড়ীত মৃতদেহটো আনি তাতেই পেলাই দিয়ে। তেতিয়াৰ পৰা অৰ্থাৎ গোটেই ৰাতি মৃতদেহটো তাতেই পৰি আছিল।

অভিযুক্ত ক’লা ৰঙৰ স্ক’ৰপিঅ’ গাড়ীত আহিছিল বুলি মৃতকৰ পৰিয়ালে দাবী কৰিছে। তাৰ পাছত মৃতদেহটো এৰি নিশাৰ আন্ধাৰত পলাই যায়। ঘৰৰ বাহিৰত ৰখা চিচিটিভি ফুটেজত দেখা গ’ল সমগ্ৰ দৃশ্য।

ইতিমধ্যে গাড়ীখন চিনাক্ত কৰা হৈছে বুলি আৰক্ষীয়ে জনাইছে। সেইখন কোনো আৰক্ষীৰ উপ-পৰিদৰ্শকৰ গাড়ী বুলি কোৱা হৈছে। সমগ্ৰ বিষয়টোৰ তদন্ত চলি আছে। আৰক্ষী বিষয়াজনে এই বিষয়ে কিবা জানিছিল নে তেওঁৰ অজ্ঞাতে মৃতদেহটো তেওঁৰ গাড়ীত অনা হৈছিল?

কিন্তু নৱবিবাহিতাৰ এনে কৰুণ পৰিণতি কিয় হ’ল? তেওঁৰ পৰিয়ালৰ দাবী যে ছোৱালীজনী যৌতুক প্ৰথাৰ বলি হ’বলগীয়া হৈছে। ছোৱালীজনীৰ পিতৃ জ্যোতিপ্ৰকাশ মাহাতোৱে জানিবলৈ দিয়া মতে, ৯ মাহ পূৰ্বে তেওঁৰ কন্যা সৰিতাই সত্যেন্দ্ৰ কুমাৰ নামৰ এজন যুৱকৰ সৈতে বিবাহপাশত আবদ্ধ হৈছিল। সামৰ্থ্যৰ ভিতৰত তেওঁ যৌতুক দিছিল। কিন্তু তাৰপিছতো তেওঁক অধিক যৌতুক বিচাৰি চাপ দিয়া হৈছিল।

জনা যায় যে ইতিমধ্যে ৮ লাখ টকা দিয়া হৈছিল। কিন্তু সৰিতাৰ স্বামী আৰু শহুৰেকৰ পৰিয়ালৰ আন লোকে আৰু ৩ লাখ টকাৰ বাবে চাপ দিছিল। আৰু তাৰ লগে লগে নৱবিবাহিতাৰ ওপৰত অত্যাচাৰ কৰা হৈছিল। পিতৃ জ্যোতিপ্ৰকাশে দাবী কৰে যে সেইবাবেই অৱশেষত তেওঁৰ কন্যাক হত্যা কৰা হ’ল।

সৰিতাৰ মৃতদেহ মৰণোত্তৰ পৰীক্ষাৰ বাবে প্ৰেৰণ কৰা হৈছে। সৰিতাৰ ডিঙিত ডিঙি চেপি ধৰাৰ চিন থকা বুলি দাবী কৰিছে সৰিতাৰ পিতৃয়ে। এতিয়ালৈকে কোনো লোকক গ্ৰেপ্তাৰ কৰা নাই আৰক্ষীয়ে। তদন্ত অব্যাহত আছে।