লখিমপুৰৰ কংগ্ৰেছ প্ৰাৰ্থী অনিল বৰগোহাঁইৰ আক্ৰমণৰ ঘটনা; মুঠ ৯ জনক আটক
চিলাপথাৰত শুকুৰবাৰে সন্ধিয়া লখিমপুৰ সমষ্টিৰ কংগ্ৰেছ প্ৰাৰ্থী অনিল বুঢ়া গোহাঁইৰ বাহনত চলোৱা আক্ৰমণৰ ঘটনাৰ লগত জড়িত আন ৪ জনকৈ আক্ৰমণকাৰীয়ে শনিবাৰে অৰ্থাৎ ৬ এপ্ৰিলত চিলাপথাৰ থানাত আত্মসমৰ্পণ কৰে। চিলাপথাৰ আৰক্ষীয়ে বৰ্তমানলৈকে এই ঘটনাৰ লগত জড়িত মুঠ ৯ জন আক্ৰমণকাৰীক আটক কৰে।
আটকাধীন ৯ জন আক্ৰমণকাৰীক আৰক্ষীয়ে ক্ৰমে কনক দলে, সত্যজিত চুংক্ৰাং, কৈলাশ মিলি, পবিত্ৰ মিলি, গনেশ মিলি, ভবেন টায়ে, ৰাজ য়েইন, ৰাজু টায়ে আৰু লিখন মৰাং।
উল্লেখযোগ্য যে শুকুৰবাৰে অৰ্থাৎ ৫ এপ্ৰিলত চিলাপথাৰত কংগ্ৰেছ প্ৰাৰ্থীগৰাকীক দুৰ্বৃত্তই আক্ৰমণ চলাইছিল। এই আক্ৰমণত বৰগোহাঁইৰ এ এছ ২২ বি ৪২৮৪ মহিন্দ্ৰা এক্স য়ু ভি বাহনখনৰ পিছফালৰ আইনা ভাঙি যায়। এই ঘটনাত কংগ্ৰেছ প্ৰাৰ্থীগৰাকীৰ লগতে আন কেইবাজনো কংগ্ৰেছ সমৰ্থক আঘাতপ্ৰাপ্ত হৈছিল।
ইফালে ঘটনা সংঘটিত হোৱাৰ লগে লগে কংগ্ৰেছ সমৰ্থকসকলে এই ঘটনাক তীব্ৰ ভাষাৰে গৰিহনা দিয়াৰ লগতে দোষীক উপযুক্ত শাস্তি প্ৰদানৰ দাবীত কিছু সময়ৰ বাবে ৰাষ্ট্ৰীয় ঘাইপথো অৱৰোধ কৰিছিল। পিছত জিলা আৰক্ষী অধীক্ষক ঘটনাস্থলীত উপস্থিত হৈ আক্ৰমণকাৰীক গ্ৰেপ্তাৰ কৰাৰ লিখিত প্ৰতিশ্ৰুতি প্ৰদান কৰাৰ পিছত পথ অৱৰোধ উঠাই লোৱা হয়।
আনহাতে এইক্ষেত্ৰত মিচিং জাতীয় সংগঠন কোনোপধ্যে জগৰীয়া নহয় বুলি টি এম পি কেৰ নেতাই দাবী জনাইছে। একেদৰে ৰাজনৈতিক মুনাফা আৰু সস্তীয়া প্ৰচাৰৰ লোভত ঘটনাৰ সন্দৰ্ভত অজ্ঞ সাংসদ-বিধায়কৰ নামৰ লগতে জাতীয় সংগঠন কৰ্মীৰ বিৰুদ্ধে নিকৃষ্ট ষড়যন্ত্ৰ কৰা বুলি বিধায়ক ভুবন পেগুৱেও প্ৰতিক্ৰিয়া প্ৰকাশ কৰিছে।