২০২৫ বৰ্ষৰ চিকিৎসা বিজ্ঞানৰ ন’বেল বঁটা ঘোষণা: তিনিগৰাকী বিজ্ঞানীলৈ এই সন্মান

আজি অৰ্থাৎ ৬ অক্টোবৰ পৰা আৰম্ভ হৈছে ঘোষণা ২০২৫ বৰ্ষৰ ন’বেল বঁটা ঘোষণাৰ কাৰ্যসূচী। ন’বেল কমিটীয়ে সোমবাৰে ঘোষণা কৰিলে চিকিৎসা বিজ্ঞানৰ ন’বেল বঁটা বিজয়ীৰ নাম। চিকিৎসা বিজ্ঞানৰ ক্ষেত্ৰলৈ আগবঢ়োৱা অৱদানৰ স্বীকৃতিস্বৰূপে মেৰী ই. ব্ৰুংকো, ফ্ৰেড ৰেমছডেল আৰু শ্বিমল ছাকাগুচিক ২০২৫ বৰ্ষৰ ন’বেল বঁটা প্ৰদান কৰা হ’ব। এই তিনিওজনক পেৰিফেৰেল ইমিউন ট’লাৰেন্সৰ সৈতে জড়িত আৱিষ্কাৰৰ বাবে এই সন্মান প্ৰদান কৰা হৈছে।

পেৰিফেৰেল ইমিউন ট’লাৰেন্স হৈছে শৰীৰৰ ৰোগ প্ৰতিৰোধ প্ৰণালীৰ এক গুৰুত্বপূৰ্ণ ব্যৱস্থা, যিয়ে শৰীৰক বাহ্যিক জীৱাণুৰ পৰা ৰক্ষা কৰাৰ লগতে নিজৰ কলা-কোষক আক্ৰমণ কৰাত বাধা দিয়ে। উল্লেখ্য যে, বিগত বৰ্ষত (২০২৪) মাইক্ৰ’আৰএনএ (ৰাইব’নিউক্লিক এচিড)ৰ আৱিষ্কাৰৰ বাবে আমেৰিকাৰ ভিক্টৰ এম্ব্ৰ’জ আৰু গেৰী ৰুভকুনক যৌথভাৱে এই বঁটা প্ৰদান কৰা হৈছিল। মাইক্ৰ’আৰএনএ হৈছে জিনীয় পদাৰ্থৰ ক্ষুদ্ৰ কণা, যিয়ে কোষৰ ভিতৰত অন-অফ চুইচৰ দৰে কাম কৰি কোষৰ কাৰ্যকলাপ নিয়ন্ত্ৰণ কৰে।

উল্লেখ্য যে মঙলবাৰে পদাৰ্থ বিজ্ঞান, বুধবাৰে ৰসায়ন বিজ্ঞান, বৃহস্পতিবাৰে সাহিত্য, শুকুৰবাৰে শান্তি আৰু ১৩ অক্টোবৰত অৰ্থনীতিৰ ন’বেল বঁটা বিজয়ীৰ নাম ঘোষণা কৰা হ’ব। এইবাৰ শান্তিৰ ন’বেল বঁটাৰ বাবে আমেৰিকাৰ ৰাষ্ট্ৰপতি ড’নাল্ড ট্ৰাম্পক মনোনীত কৰা হৈছে। তেওঁ এই বঁটা লাভ কৰিব নে নহয়, সেয়া লক্ষণীয় হ’ব।

প্ৰসংগ ক্ৰমে এই বঁটাসমূহ আলফ্ৰেড ন’বেলৰ মৃত্যু বাৰ্ষিকীত, অৰ্থাৎ ১০ ডিচেম্বৰত প্ৰদান অনুষ্ঠান অনুষ্ঠিত হ’ব। ন’বেল আছিল ছুইডেনৰ এগৰাকী ধনী উদ্যোগপতি আৰু ডাইনামাইটৰ উদ্ভাৱক। ১৮৯৫ চনৰ উইলত তেওঁ নিজৰ সম্পত্তিৰ এক বৃহৎ অংশ এই বাৰ্ষিক বঁটাসমূহৰ বাবে এৰি থৈ গৈছিল। ১৯০১ চনত প্ৰথমবাৰৰ বাবে পদাৰ্থ বিজ্ঞান, ৰসায়ন বিজ্ঞান, চিকিৎসা বিজ্ঞান, সাহিত্য আৰু শান্তিৰ ক্ষেত্ৰত এই বঁটা প্ৰদান কৰা হয়। পিছলৈ ১৯৬৮ চনত ছুইডেনৰ কেন্দ্ৰীয় বেংকে অৰ্থনীতিৰ ন’বেল বঁটা যোগ কৰি মুঠ ছটা কৰে।